حیدرآباد: نیشنل میڈیکل کمیشن (NMC) نے لائیو سرجریز پر نئی اور سخت NMC Guidelines جاری کی ہیں، جن کے تحت ان آپریشنز کا کسی بھی قسم کے تشہیری یا تجارتی مقاصد کے لیے استعمال سختی سے ممنوع قرار دیا گیا ہے۔ ان ہدایات میں مریضوں کی سلامتی اور اخلاقی اصولوں کی مکمل پاسداری کو لازمی قرار دیا گیا ہے۔
یہ اقدام سپریم کورٹ میں دائر اُس درخواست کے پس منظر میں آیا ہے جس میں الزام لگایا گیا تھا کہ نجی اسپتال لائیو سرجریز کا استعمال اپنے انفراسٹرکچر کی تشہیر، سرجنز کی مہارت کو اجاگر کرنے اور میڈیکل کمپنیوں کے پراڈکٹس کو فروغ دینے کے لیے کر رہے ہیں، جس سے مریضوں کی صحت کو خطرہ لاحق ہو رہا ہے۔
کمیشن نے ایک اعلیٰ سطحی کمیٹی تشکیل دے کر اس پر غور کیا اور نئی ہدایات جاری کیں، جن کے مطابق:
- صرف وہ اسپتال لائیو سرجری کر سکتے ہیں جن کے پاس منظور شدہ ایکریڈیٹیشن ہو۔
- آپریشن تھیٹروں میں مکمل سہولیات، بشمول پری آپریٹو، اینستھیزیا، آئی سی یو، اور لیبز موجود ہونا ضروری ہے۔
- ایسے مریض جن کی تشخیص مکمل نہ ہو یا جنہیں سنگین خطرات لاحق ہوں، انہیں لائیو سرجری کے لیے منتخب نہیں کیا جا سکتا۔
صرف تربیتی مقصد کے لیے ریکارڈ شدہ ویڈیوز کا استعمال
لائیو سرجریز کی جگہ تربیتی مقاصد کے لیے ریکارڈ شدہ ویڈیوز کا استعمال ترجیح دی جائے گا۔ مریض کی تحریری رضامندی لازمی ہوگی جس میں خطرات، فوائد، اور رازداری سے متعلق مکمل تفصیل شامل ہو۔
اب تمام لائیو سرجری کے لیے ریاستی میڈیکل کونسل یا نیشنل میڈیکل کمیشن سے پیشگی منظوری حاصل کرنا لازمی ہوگا۔ بیرون ملک سے آنے والے ماہرین کو NMC کی ایتھکس و میڈیکل رجسٹریشن بورڈ سے عارضی اجازت درکار ہوگی۔
اعلیٰ سطحی نگران ادارہ قائم
کمیشن نے ایک اعلیٰ سطحی نگران ادارہ تشکیل دیا ہے جو لائیو سرجریز کی نگرانی کرے گا تاکہ یہ سرگرمیاں صرف تعلیمی مقاصد کے لیے ہوں اور مریضوں کی سلامتی اور طبی اخلاقیات پر سمجھوتہ نہ کیا جائے۔
سرجنز اور منتظمین کو واضح ہدایت دی گئی ہے کہ وہ آپریشن کے دوران ناظرین سے بات چیت سے گریز کریں اور ساری توجہ مریض کی دیکھ بھال پر مرکوز رکھیں۔
میڈیکل برادری میں بڑھتی ہوئی تشویش کے پیش نظر یہ ضابطے واضح رہنمائی فراہم کرنے، اعتماد بحال کرنے اور مریضوں کی فلاح کو مرکزی اہمیت دینے کے لیے جاری کیے گئے ہیں۔
