حیدرآباد: تلنگانہ کے راجنا سرسلہ ضلع کے لنگم پیٹ میں ایک پولٹری فارم میں 2500 مرغیاں مردہ پائی گئیں، جس کے بعد مقامی افراد میں تشویش کی لہر دوڑ گئی ہے۔ اگرچہ یہ واقعہ ایک ہفتہ قبل پیش آیا تھا، لیکن اس کی اطلاع جمعرات کو عام ہوئی۔
مقامی افراد کے مطابق، اس پولٹری فارم میں پہلے بھی 1000 مرغیاں مر چکی تھیں، اور اب تعداد 2500 تک پہنچ گئی ہے۔ مرغیوں کی بڑے پیمانے پر ہلاکت کی وجوہات تاحال واضح نہیں، لیکن برڈ فلو کے خدشے نے عوام میں بے چینی پیدا کر دی ہے۔
حکام نے ابھی تک برڈ فلو کی موجودگی کی تصدیق نہیں کی ہے، تاہم محکمہ حیوانات اور صحت کے افسران نے نمونے اکٹھے کر لیے ہیں اور تفصیلی معائنے کے بعد ہی اصل وجہ کا اعلان کیا جائے گا۔ مقامی افراد حکام سے فوری وضاحت اور احتیاطی تدابیر اختیار کرنے کا مطالبہ کر رہے ہیں۔