حیدرآباد: بی آر ایس ایم ایل اے ویمولا پرشانت ریڈی نے تلنگانہ اسمبلی میں جذباتی ریمارکس دیتے ہوئے کہا کہ وہ مرنے کے بعد اپنے جسدِ خاکی پر قومی پرچم لپیٹے جانے کا شرف حاصل کر چکے ہیں۔
تلنگانہ میں اسمبلی اجلاس جاری ہیں۔ ان اجلاسوں کے دوران وزراء اپنی متعلقہ محکموں کے بجٹ اسمبلی میں پیش کر رہے ہیں۔ روڈز اینڈ بلڈنگز محکمہ کا بجٹ وزیر کوماٹی ریڈی وینکٹ ریڈی نے پیش کیا۔
اس موضوع پر بحث کے دوران بی آر ایس لیڈر پرشانت ریڈی نے کہا کہ سابق وزیر اعلیٰ کے سی آر کی مہربانی اور بالکنڈہ حلقہ کے عوام کی حمایت سے وہ لگاتار تین مرتبہ اسمبلی کے لیے منتخب ہوئے ہیں۔
انہوں نے مزید کہا کہ کے سی آر نے انہیں چار سال تک مشن بھاگیرتھ کے چیئرمین اور پانچ سال تک وزیر کے طور پر خدمات انجام دینے کا موقع دیا۔ انہوں نے کہا کہ خدا کی طرف سے دی گئی طاقت کے مطابق انہوں نے ریاست کی خدمت کی۔
جذباتی انداز میں انہوں نے کہا کہ ان کے انتقال کے بعد ان کے جسد خاکی پر قومی پرچم لپیٹا جائے گا اور گن سیلوٹ بھی دیا جائے گا۔ یہ ایک ایسا اعزاز ہے جو بہت کم لوگوں کو حاصل ہوتا ہے، اور انہیں بھی یہ شرف حاصل ہو چکا ہے۔
تاہم، انہوں نے افسوس ظاہر کرتے ہوئے کہا کہ جب انہیں اسمبلی میں بولنے کا موقع دیا گیا تو کچھ ارکان نے مداخلت کی۔ انہوں نے اسپیکر سے درخواست کی کہ وہ اس بات کو یقینی بنائیں کہ جب وہ بولیں تو کوئی مداخلت نہ کرے۔
