حیدرآباد: تلنگانہ کے وزیر زراعت توملا ناگیشور راؤ نے ریاست بھر میں حالیہ بے وقت بارش اور اولے پڑنے کے نتیجے میں فصلوں کو پہنچنے والے نقصان کا جائزہ لینے کی ہدایت جاری کی ہے۔
انہوں نے محکمہ زراعت کے عہدیداروں کو ہدایت دی کہ وہ متاثرہ علاقوں میں موقع پر پہنچ کر تفصیلی معائنہ کریں اور فصلوں کو ہوئے نقصان پر ابتدائی رپورٹ فوری طور پر پیش کریں۔ وزیر موصوف نے کہا کہ متاثرہ کسانوں کی فوری مدد کے لیے حکومت ہر ممکن اقدام کرے گی اور اس سلسلے میں کسی قسم کی تاخیر برداشت نہیں کی جائے گی۔
توملا ناگیشور راؤ نے ان واقعات کی نشاندہی کی جہاں خریداری مراکز پر دھان کی بوریاں کھلے آسمان تلے بارش میں بھیگ گئیں، کیونکہ وہاں ترپال کا مناسب انتظام نہیں تھا۔ انہوں نے مارکیٹنگ محکمے کے حکام کو ہدایت دی کہ وہ زرعی اجناس کو موسمی اثرات سے محفوظ رکھنے کے لیے فوری حفاظتی انتظامات کریں۔
اس کے ساتھ ہی انہوں نے مارک فیڈ کے افسران کو ہدایت دی کہ وہ خریدی گئی فصلوں کو جلد از جلد گوداموں میں منتقل کریں تاکہ ان کے خراب ہونے سے بچا جا سکے۔ انہوں نے کہا کہ فصلوں کی منتقلی میں کسی بھی قسم کی کوتاہی ناقابل قبول ہوگی۔
دوسری جانب محکمہ موسمیات کی رپورٹ کے مطابق ریاست کے کئی اضلاع میں آئندہ دنوں میں ہلکی تا درمیانی بارش ہونے کا امکان ہے۔ اس تناظر میں وزیر اعلیٰ ریونت ریڈی نے چیف سیکریٹری کو ہدایت دی ہے کہ وہ صورتحال پر مسلسل نظر رکھیں اور متعلقہ محکموں کو ہر وقت الرٹ رکھیں تاکہ کسانوں اور عوام کو کسی قسم کی پریشانی نہ ہو۔
ریاستی حکومت کی جانب سے اس معاملے کو سنجیدگی سے لیتے ہوئے ضلعی کلکٹرز کو بھی متحرک کر دیا گیا ہے تاکہ متاثرہ علاقوں میں نقصانات کا جلد از جلد اندازہ لگا کر موزوں اقدامات کیے جا سکیں۔
