حیدرآباد: Turkakasha Community اور پتھر پھو ڈ مسلم برادریوں کی سماجی و اقتصادی ترقی کے لیے ایک علیحدہ فلاحی کارپوریشن کے قیام کا پرزور مطالبہ کیا گیا ہے۔ یہ مطالبہ ترکا کشہ سنگم کے ریاستی رکن ایس کے کریم نے بدھ کے روز حیدرآباد کے حج ہاؤس میں منعقدہ ایک اجلاس کے دوران اٹھایا۔
یہ وفد ترکاکشہ سنگم کے ریاستی صدر ایس کے بدی صاحب کی قیادت میں تلنگانہ اسٹیٹ مائناریٹی فائننس کارپوریشن کے صدر نشین محمد عبیداللہ کوتوال اور ایم ایل سی عامر علی خان سے ملاقات کے لیے پہنچا۔
ایس کے کریم نے ترکاکشہ مزدوروں کی حالتِ زار کو اجاگر کرتے ہوئے کہا کہ یہ خاندان شدید گرمی میں پتھروں کو توڑنے جیسا سخت ترین کام انجام دے کر اپنا گزر بسر کرتے ہیں۔ اس کام کے دوران اکثر افراد ہاتھ پاؤں توڑ بیٹھتے ہیں اور جسمانی چوٹوں کا شکار ہو جاتے ہیں۔
انہوں نے کہا کہ ایسی مشقت کے باوجود ان برادریوں کی بنیادی ضروریات بھی بمشکل پوری ہو پاتی ہیں۔ اب وقت آ گیا ہے کہ ان محروم طبقات کے ساتھ انصاف کیا جائے۔
ترکاکشہ سنگم کی جانب سے مطالبہ کیا گیا کہ ریاستی حکومت ایک خصوصی ترقیاتی کارپوریشن قائم کرے جو صرف ترکاکشہ اور پتھر پھوڑ مسلم برادریوں کی فلاح و بہبود پر توجہ دے۔ اس کارپوریشن کے تحت فلاحی اسکیمیں، مالی امداد، اور دیگر سہولیات فراہم کی جا سکیں گی جو ان کی مخصوص ضروریات کو مدنظر رکھتے ہوئے تیار کی جائیں۔
اجلاس میں ضلع اور منڈل سطح کے کئی ترکا کشہ قائدین نے بھی شرکت کی، جس سے اس مطالبے کو مزید تقویت ملی۔ تمام شرکاء نے اس بات پر زور دیا کہ حکومت کو فوری طور پر اس مطالبے پر غور کرتے ہوئے ان برادریوں کے لیے ایک منظم اور مؤثر اقدام کرنا چاہیے۔
