حیدرآباد: Toshiba Factory کے تحت تلنگانہ میں صنعتی ترقی کو ایک اور نئی جہت حاصل ہوئی ہے، جہاں توشیبا کارپوریشن کی ذیلی کمپنی ٹی ٹی ڈی آئی (ٹرانسمیشن ڈسٹری بیوشن سسٹمز انڈیا) نے ریاستی حکومت کے ساتھ 562 کروڑ روپۓ کی سرمایہ کاری کا معاہدہ کیا ہے۔ یہ معاہدہ ٹوکیو میں وزیر اعلیٰ ریونت ریڈی کی موجودگی میں طے پایا۔
معاہدے کے مطابق رُدرارم میں نئی فیکٹری قائم کی جائے گی جہاں جدید ٹیکنالوجی سے لیس سَرج اریسٹرس تیار کیے جائیں گے۔ اس کے ساتھ ہی پاور ٹرانسفارمرز، ڈسٹری بیوشن ٹرانسفارمرز، اور گیس انسولیٹڈ سوئچ گیئر (GIS) کی تیاری کے لیے موجودہ دو فیکٹریوں کو بھی اپ گریڈ کیا جائے گا۔
اس سرمایہ کاری سے جہاں بجلی کے شعبے میں بڑھتی ہوئی طلب کو پورا کیا جائے گا، وہیں مقامی نوجوانوں کے لیے روزگار کے مواقع بھی پیدا ہوں گے۔ ٹی ٹی ڈی آئی پہلے ہی رُدرارم میں دو فیکٹریاں کامیابی سے چلا رہی ہے اور اب تیسری فیکٹری کے قیام سے اپنی پیداواری صلاحیت کو مزید وسعت دے رہی ہے۔
اس معاہدے پر توشیبا کارپوریشن کے انرجی بزنس ڈائریکٹر ہیروشی کنیٹا، ٹی ٹی ڈی آئی کے چیئرمین و منیجنگ ڈائریکٹر ہیروشی فُرُوتا، اور ریاستی حکومت کے خصوصی چیف سکریٹری جیش رنجن نے دستخط کیے۔
وزیر اعلیٰ ریونت ریڈی نے کہا کہ تلنگانہ ملک میں اقتصادی تبدیلی کا علمبردار بن چکا ہے اور بین الاقوامی سرمایہ کاری کو راغب کرنے کے لیے یہاں صنعتی شراکت داری اور حکمت عملی پر مبنی تعاون جاری ہے۔ انہوں نے کہا کہ توشیبا کی نئی سرمایہ کاری ریاست میں صنعتی شعبے کو نئی توانائی بخشے گی۔
ٹی ٹی ڈی آئی کے چیئرمین ہیروشی فُرُوتا نے کہا کہ تلنگانہ حکومت کی صنعتی پالیسیوں اور اختراعات کے لیے اس کی وابستگی نے انہیں یہاں سرمایہ کاری کی ترغیب دی۔ انہوں نے کہا کہ وہ ریاست کے ساتھ کام کرنے کے لیے پُرجوش ہیں اور مستقبل میں مزید شراکت داری کے امکانات بھی تلاش کیے جا رہے ہیں۔
Toshiba Transmission & Distribution Systems (India) Private Limited (#TTDI) has announced a strategic collaboration with the Government of #Telangana to drive investment and foster innovation in products and solutions tailored to the needs of the Transmission and Distribution… pic.twitter.com/erqbuwkk7S
— Telangana CMO (@TelanganaCMO) April 18, 2025
