حیدرآباد: آئی اے ایس آفیسر سمیتا سبھروال نے پولیس کے ساتھ مکمل تعاون کیا اور ایک شہری کے طور پراپنا تفصیلی بیان دیا ہے۔ انہوں نے سوشل میڈیا پر جاری بیان میں کہا کہ یہ پوسٹ تقریباً 2000 افراد نے شیئر کی ہے، اور انہوں نے پوچھا کہ کیا سب کے خلاف یکساں کاروائی کی گئی ہے؟ اگر نہیں، تو یہ قدرتی انصاف اور قانون کے تحت برابری کے اصولوں پر سوال اٹھاتا ہے۔
پولیس نے سمیتا سبھروال کو بھارتیہ ناگرک سرکشا سنہیتا (BNSS) کی دفعہ 179 کے تحت نوٹس جاری کیا، جس کے تحت کسی شخص کو گواہی کے لیے طلب کیا جا سکتا ہے۔ پولیس کا کہنا ہے کہ انہوں نے اس تصویر کے شیئر ہونے کے بعد تحقیقات کا آغاز کیا ہے، کیونکہ یہ تصویر مبینہ طور پر جھوٹی معلومات پھیلانے کے زمرے میں آتی ہے۔
سمیتا سبھروال کو گچی باؤلی پولیس نے ایک مصنوعی ذہانت سے تیار کردہ تصویر کو سوشل میڈیا پر شیئر کرنے پر نوٹس جاری کیا ہے۔ یہ تصویر کنچہ گچی باؤلی کے متنازعہ زمین کے معاملے سے متعلق ہے، جو حیدرآباد سنٹرل یونیورسٹی کے قریب واقع ہے۔
سمیتا سبھروال، جو اس وقت ریاستی محکمہ سیاحت، ثقافت اور نوجوانوں کی ترقی کی پرنسپل سکریٹری ہیں، نے 31 مارچ کو ایک ‘گبلی’ طرز کی تصویر کو اپنے سوشل میڈیا اکاؤنٹ پر شیئر کیا تھا۔ اس تصویر میں زمین ہموار کرنے والی مشینیں، ہرن اور مور دکھائے گئے تھے، جو مبینہ طور پر علاقے کی ماحولیاتی حالت پر تنقید کی عکاسی کرتے ہیں۔
کنچہ گچی باؤلی کی 400 ایکڑ زمین پر حکومت کی جانب سے شہری بنیادی ڈھانچے اور آئی ٹی پارک کی تعمیر کے لیے منصوبہ بندی کی جا رہی ہے، جس پر ماحولیاتی تحفظ کے حامیوں اور طلباء نے اعتراضات اٹھائے ہیں۔ یہ معاملہ اس وقت تلنگانہ ہائی کورٹ اور سپریم کورٹ میں زیر سماعت ہے۔
پولیس نےسمیتا سبھروال کو نوٹس جاری کرنے کے بعد ان سے مزید معلومات حاصل کرنے کے لیے دوبارہ رابطہ کرنے کا ارادہ ظاہر کیا ہے۔ اس معاملے پر قانون کے مطابق کاروائی جاری ہے۔
