حیدرآباد: تلنگانہ حکومت نے ایمرجنسی خدمات تک رسائی کو آسان بنانے کے لیے ایک اہم قدم اٹھاتے ہوئے [en]Emergency Helpline Number[/en] 112 کو ریاست بھر کے لیے مرکزی ہیلپ لائن نمبر کے طور پر متعارف کرایا ہے۔ اس نئے نمبر کے تحت پولیس، ایمبولنس، خواتین کی سلامتی، بچوں کے تحفظ اور آفات سے نمٹنے کی خدمات کو ایک ہی پلیٹ فارم پر یکجا کر دیا گیا ہے۔
اس جدید نظام کا افتتاح ڈائریکٹر جنرل آف پولیس جتیندر نے کیا، جنہوں نے کہا کہ اب شہریوں کو مختلف ہنگامی نمبرز یاد رکھنے کی ضرورت نہیں۔ پہلے الگ الگ نمبرز جیسے 100 (پولیس)، 108 (طبی ایمرجنسی)، 181 (خواتین کے لیے)، 1098 (بچوں کے تحفظ کے لیے)، اور 1077 (آفات سے نمٹنے کے لیے) استعمال ہوتے تھے، جنہیں اب 112 میں ضم کر دیا گیا ہے۔
یہ نیا نظام “تلنگانہ ایمرجنسی ریسپانس سپورٹ سسٹم” (TGERSS) کے تحت کام کرے گا، جو نہ صرف تیز رسپانس کو یقینی بناتا ہے بلکہ جدید ٹیکنالوجی سے بھی لیس ہے۔ کال کرنے پر جی پی ایس کے ذریعے مقام کا پتہ لگا کر فوری مدد بھیجی جائے گی۔
اینڈرائیڈ فون استعمال کرنے والے صارفین موبائل کا پیینک بٹن دبا کر خودکار طور پر ایمرجنسی کال کر سکتے ہیں۔
حکام نے عوام سے اپیل کی ہے کہ وہ 112 نمبر کو محفوظ کریں اور کسی بھی ایمرجنسی کی صورت میں بلا جھجک اس کا استعمال کریں، چاہے وہ پولیس، طبی امداد، خواتین و بچوں کا تحفظ، یا قدرتی آفات سے متعلق ہو۔
یہ قدم ریاست میں ہنگامی خدمات کو مربوط بنانے اور شہریوں کو بروقت امداد فراہم کرنے کے عزم کی علامت ہے۔
