حیدرآباد: تلنگانہ کے تروملگیری پولیس نے ایک ایسے نوجوان کو گرفتار کیا ہے جو خود کو آرمی افسر ظاہر کر کے خواتین کو نوکریوں کا جھانسہ دے رہا تھا۔ [en]Job Fraud[/en] کا یہ معاملہ اس وقت بے نقاب ہوا جب وہ دو خواتین کو غیر مجاز طور پر آرمی کینٹین میں داخل کرنے کی کوشش کر رہا تھا۔
گرفتار ملزم کی شناخت آشیش کمار کے طور پر ہوئی ہے، جو بہار کا رہنے والا ہے اور حیدرآباد میں ایک پرائیویٹ سیکیورٹی گارڈ کے طور پر کام کر رہا تھا۔ پولیس کے مطابق، اس نے آرمی سے وابستہ ہونے کا دعویٰ کیا اور بہار کی کم از کم 20 خواتین سے آرمی کینٹین میں آؤٹ سورسنگ نوکری دلانے کے نام پر رقم وصول کی۔
آشیش کمار اس وقت پکڑا گیا جب اس نے دو خواتین کو لے کر آرمی کینٹین میں داخل ہونے کی کوشش کی۔ سیکیورٹی اہلکاروں نے اس پر شک ظاہر کیا اور فوری طور پر پولیس کو اطلاع دی۔ تفتیش کے دوران معلوم ہوا کہ وہ آرمی کا کوئی ملازم نہیں بلکہ ایک دھوکہ باز شخص ہے۔
پولیس نے اسے حراست میں لے کر اس کے خلاف دھوکہ دہی کی دفعات کے تحت مقدمہ درج کر لیا ہے۔ کیس کی مزید تحقیقات جاری ہیں، اور پولیس دیگر متاثرہ خواتین سے بھی رابطہ قائم کر رہی ہے تاکہ دھوکہ دہی کے دائرے کا مکمل پتہ لگایا جا سکے۔
پولیس نے عوام کو مشورہ دیا ہے کہ وہ نوکریوں کے نام پر کسی بھی غیر مصدقہ فرد پر بھروسہ نہ کریں اور ایسی کسی بھی مشکوک سرگرمی کی فوری اطلاع پولیس کو دیں۔
