حیدرآباد: شہر حیدرآباد کے علاقہ حیدرنگر، میاں پور میں پیر کی صبح متعدد غیر مجاز عمارتوں کو منہدم کردیا گیا۔ یہ انہدامی کارروائی HYDRAA کی جانب سے مقامی پولیس کی نگرانی میں انجام دی گئی۔
حکام کو اطلاعات ملی تھیں کہ سرکاری اراضی پر ناجائز قبضہ کرتے ہوئے غیر قانونی تعمیرات کی جارہی ہیں، جس کے بعد حیدرآباد ڈیزاسٹر ریسپانس اینڈ ایسیٹ پروٹکشن ایجنسی (حیڈرا) کی ٹیم بھاری مشنری کے ساتھ موقع پر پہنچ گئی۔ اہلکاروں نے فوری کارروائی کرتے ہوئے ان غیر قانونی ڈھانچوں کو منہدم کردیا۔
دستیاب معلومات کے مطابق، انہدامی عمل سخت سیکیورٹی کے درمیان انجام پایا، تاکہ کسی قسم کی مزاحمت یا ناخوشگوار واقعہ سے بچا جا سکے۔ اس دوران چند مقامی افراد نے اس کارروائی کو روکنے کی کوشش کی، تاہم پولیس نے حالات کو قابو میں رکھا۔
حکام نے واضح کیا کہ سرکاری اراضی پر قبضے کے خلاف سخت اقدامات جاری رہیں گے، اور غیر مجاز تعمیرات کو کسی صورت برداشت نہیں کیا جائے گا۔ انہدامی کارروائیاں آئندہ دنوں بھی جاری رہنے کا امکان ہے۔
