حیدرآباد: تلنگانہ اسٹیٹ کونسل فار ہائر ایجوکیشن (TSCHE) نے ڈگری طلباء پر تعلیمی بوجھ کم کرنے کے مقصد سے تین سالہ انڈرگریجویٹ کورسز میں کل Degree Credits کو 150 سے گھٹا کر 124 کرنے کا فیصلہ کیا ہے۔ یہ نیا تعلیمی خاکہ تعلیمی سال 2025–26 سے نافذ العمل ہوگا۔
ترمیم شدہ ڈھانچے کے تحت اہم مضامین کے کریڈٹس 60 سے کم کر کے 56 کر دیے جائیں گے۔ انگریزی مضمون میں 20 کے بجائے 12 کریڈٹس رکھے جائیں گے، جبکہ دوسری زبانیں جیسے تلگو اور ہندی کے کریڈٹس بھی 20 سے گھٹا کر 12 کر دیے گئے ہیں۔ نئی پالیسی کے تحت زبان کے مضامین کو آخری سال کے نصاب سے مکمل طور پر نکال دیا گیا ہے۔
حکام کا کہنا ہے کہ اس اقدام کا مقصد نصاب کا دباؤ کم کرنا اور ٹیکنالوجی پر مبنی و ویلیو ایڈیڈ کورسز کے لیے گنجائش پیدا کرنا ہے۔ اس ماڈل کو حتمی شکل دینے سے قبل مختلف یونیورسٹیوں کے بورڈ آف اسٹڈیز کے چیئرمین حضرات سے رائے لی گئی۔ کونسل کے چیئرمین بی بالا کشور ریڈی کے مطابق یہ تبدیلی طلباء کی ہمہ جہتی ترقی اور بہتر تعلیمی نتائج کیلئے ناگزیر تھی۔
ادھر، آئی آئی ٹی مدراس نے بھی 2025–26 سے دو نئے بی ٹیک پروگرامز متعارف کروانے کا اعلان کیا ہے۔ نئے کورسز میں کمپیوٹیشنل انجینئرنگ اینڈ مکینکس (CEM) اور انسٹرومینٹیشن اینڈ بایومیڈیکل انجینئرنگ شامل ہیں، جن میں ہر ایک کے لیے 40 نشستیں مختص کی گئی ہیں۔ داخلے جے ای ای ایڈوانسڈ کے ذریعے جوسا کونسلنگ کے تحت ہوں گے۔
اسی دوران میڈیکل ریکروٹمنٹ بورڈ نے ایم پی ایچ اے (فی میل) امتحان کے نتائج جاری کر دیے ہیں، جس میں 1,931 آسامیوں کے لیے 20,600 امیدواروں نے شرکت کی۔ بورڈ نے درخواست گزاروں کو مشورہ دیا ہے کہ وہ اپنی مارکس شیٹ سرکاری ویب سائٹ پر چیک کریں۔
گزشتہ دس دنوں کے دوران گریڈ-2 فارماسسٹ کی 732 آسامیوں اور نرسنگ آفیسر کی 2,322 آسامیوں کے نتائج بھی شائع کیے جا چکے ہیں۔
