حیدرآباد: سانگاریڈی ضلع کے پشامائیلارم صنعتی علاقے میں پیر کے روز پیش آئے [en]Chemical Blast[/en] کے نتیجے میں ہلاکتوں کی تعداد بڑھ کر 21 ہو گئی ہے، جبکہ 22 سے زائد افراد زخمی ہوئے ہیں، جن میں 11 کی حالت تشویشناک بتائی جا رہی ہے۔ حکام کو اندیشہ ہے کہ ملبے تلے مزید افراد دبے ہو سکتے ہیں، جس سے ہلاکتوں میں اضافہ ممکن ہے۔
یہ دھماکہ سیگاچی انڈسٹریز پلانٹ میں اُس وقت ہوا جب وہاں موجود ریئکٹر اچانک پھٹ گیا، جس کے نتیجے میں پروڈکشن بلاک مکمل طور پر تباہ ہو گیا۔ ابتدائی اطلاعات کے مطابق دھماکے کے وقت فیکٹری میں 108 کارکن موجود تھے۔ عینی شاہدین نے بتایا کہ دھماکہ اتنا شدید تھا کہ بعض مزدور 100 میٹر دور جا گرے۔
پانچ مزدور موقع پر ہی جاں بحق ہو گئے، جبکہ 16 افراد زخموں کی تاب نہ لاتے ہوئے قریبی اسپتالوں میں دم توڑ گئے۔ 11 زخمی تاحال انتہائی نگہداشت کے وارڈ میں زیر علاج ہیں۔ جیسے ہی دھماکے کی اطلاع ملی، مزدوروں کے اہل خانہ فیکٹری کے باہر پہنچ گئے، جس کے نتیجے میں وہاں دل دہلا دینے والے مناظر دیکھنے میں آئے۔
متوفی افراد میں سگاچی پلانٹ کے نائب صدر ایل این گوون بھی شامل ہیں، جو دھماکے کے وقت گاڑی میں فیکٹری میں داخل ہو رہے تھے۔ دھماکہ اتنا زوردار تھا کہ ان کی گاڑی کے پرخچے اُڑ گئے۔
حکام نے سنگاریڈی کلکٹریٹ میں ایک کنٹرول روم قائم کیا ہے تاکہ بچاؤ کارروائیوں میں ہم آہنگی لائی جا سکے اور عوام کو معلومات فراہم کی جا سکیں۔ معلومات کے خواہشمند افراد فون نمبر 08455276155 پر رابطہ کر سکتے ہیں۔
