حیدرآباد: تلنگانہ کے Telangana formation ڈے کے موقع پر مرکزی وزیر اور بی جے پی تلنگانہ صدر جی کشن ریڈی نے سابقہ بی آر ایس حکومت کو شدید تنقید کا نشانہ بناتے ہوئے الزام عائد کیا کہ اس نے ریاست کے قیام کے اصل مقاصد کو ہائی جیک کر کے اسے قرض کے بوجھ تلے دبا دیا۔
بی جے پی ریاستی دفتر میں قومی پرچم لہرانے کے بعد خطاب کرتے ہوئے کشن ریڈی نے کہا کہ تلنگانہ کی طویل، پُرامن تحریک اور اس میں دی گئی قربانیاں ریاست کے قیام کا باعث بنیں۔ انہوں نے کہا کہ یہ ریاست کئی لوگوں کے پسینے اور قربانیوں سے حاصل ہوئی ہے۔
انہوں نے دعویٰ کیا کہ بی جے پی وہ پہلی جماعت تھی جس نے بلا جھجک تلنگانہ ریاست کے قیام کی حمایت کی۔ ان کا کہنا تھا کہ جب دیگر پارٹیاں سیاسی فائدے نقصان کا حساب کر رہی تھیں، ہم نے اصولی موقف اختیار کیا۔
کشن ریڈی کا پیغام جلد ہی تنقید میں تبدیل ہو گیا۔ انہوں نے کہا کہ نوجوانوں نے تلنگانہ سے روزگار اور انصاف کی امیدیں باندھی تھیں، لیکن حقیقت میں فائدہ صرف ایک خاندان نے اٹھایا۔ انہوں نے براہِ راست سابق وزیراعلیٰ کے چندر شیکھر راؤ کے خاندان پر حملہ کرتے ہوئے کہا کہ پچھلے دس برسوں میں عوام کے خواب چکنا چور ہو گئے، اور نوجوان بیروزگار رہ گئے۔
Live : Flag Hoisting by Shri G Kishan Reddy garu || Telangana Formation Day @ BJP State Office, Nampally https://t.co/MdWZUbGmcN
— BJP Telangana (@BJP4Telangana) June 2, 2025
انہوں نے ریاست کی مالی حالت پر بھی تشویش ظاہر کی۔ ان کے مطابق، تلنگانہ کی شروعات فاضل بجٹ کے ساتھ ہوئی تھی، مگر آج ریاست 10 لاکھ کروڑ روپئے کے قرض تلے دبی ہوئی ہے۔ انہوں نے الزام عائد کیا کہ سابق حکومت نے آبپاشی اور فلاحی اسکیمات کے نام پر مالی بدانتظامی کی۔
کشن ریڈی کے خطاب نے واضح کر دیا کہ بی جے پی تلنگانہ میں اپنی سیاسی زمین مضبوط کرنے کے لیے تحریکِ تلنگانہ کے اصل جذبے سے خود کو جوڑنے کی حکمتِ عملی پر عمل پیرا ہے۔
