حیدرآباد: جین نگر، بنسی لال پیٹ ڈویژن میں ایک مصدقہ [en]Dengue Case[/en] سامنے آنے کے بعد گریٹر حیدرآباد میونسپل کارپوریشن (جی ایچ ایم سی) نے ہنگامی بنیادوں پر ویکٹر کنٹرول اقدامات انجام دیے۔
جمعرات کو موصولہ اطلاع پر جی ایچ ایم سی کے انسدادِ مچھر ٹیم نے ڈپٹی کمشنر ڈاکون نائیک کی قیادت میں متاثرہ علاقے کا دورہ کیا۔ ٹیم نے فوری طور پر فوگنگ آپریشن اور اینٹی لاروہ کیمیکل کا اسپرے کیا تاکہ مچھروں کی افزائش کو روکا جا سکے۔
عہدیداروں نے مقامی باشندوں سے اپیل کی ہے کہ وہ اپنے اطراف کے علاقوں کو صاف رکھیں اور پانی کو کھلا یا ساکن حالت میں جمع نہ ہونے دیں کیونکہ یہی مقامات مچھر کی افزائش کا ذریعہ بنتے ہیں۔
اس مہم میں جی ایچ ایم سی ہیلتھ آفیسر ہیما لتا، ڈپٹی ایگزیکٹو انجینئر سرینواس ریڈی، اسسٹنٹ انجینئر، سپروائزر راجندر ریڈی اور صفائی عملہ بشمول محمد صادق نے حصہ لیا۔
حکام نے بتایا کہ آئندہ چند دنوں تک علاقے میں مسلسل نگرانی جاری رکھی جائے گی تاکہ مرض کے پھیلاؤ کو روکا جا سکے۔
