حیدرآباد: 4,215 کروڑ روپئے کے بڑے فالکن انوائس ڈسکاؤنٹنگ اسکام میں تلنگانہ کرائم انویسٹی گیشن ڈپارٹمنٹ CID Telanganaکو ایک بڑی کامیابی ملی ہے۔ سی آئی ڈی نے 3 جون کو حیدرآباد میں کیپیٹل پروٹیکشن فورس پرائیویٹ لمیٹڈ کے آپریشنس ہیڈ سندیپ کمار کو اس کے ساتھی روی کمار کے ساتھ گرفتار کیا۔
تحقیقات کے مطابق، سندیپ کمار اس اسکیم کا مرکزی کردار ہے، جس نے فالکن برانڈ کے تحت جعلی انوائس ڈسکاؤنٹنگ کا سہارا لے کر اربوں روپئے کی رقم کو غلط طریقے سے منتقل کیا۔ سی آئی ڈی افسران کا ماننا ہے کہ اس کی گرفتاری سے اس بڑے مالیاتی اسکام کے پیچھے کارفرما طریقہ کار اور رقم کی نقل و حرکت سے متعلق کئی اہم سراغ سامنے آئیں گے۔
اب تک اس معاملے میں سات دیگر افراد کو بھی مختلف مرحلوں میں گرفتار کیا جا چکا ہے۔ سندیپ کمار کی گرفتاری کے بعد حکام کو امید ہے کہ وہ اس پیچیدہ مالیاتی جال کو کھولنے میں کامیاب ہوں گے جس نے سرمایہ کاروں اور ضوابطی اداروں کو سخت دھچکہ پہنچایا ہے۔
فالکن اسکام کو حالیہ برسوں کا سب سے بڑا مالیاتی فراڈ تصور کیا جا رہا ہے، جس نے لاکھوں روپے کی بچت کرنے والے چھوٹے سرمایہ کاروں کا اعتماد مجروح کر دیا ہے۔ CID Telangana کے افسران نے یقین دلایا ہے کہ وہ ہر ممکن سراغ کا پیچھا کریں گے، زیادہ سے زیادہ رقم برآمد کرنے کی کوشش کریں گے، اور اسکام میں ملوث ہر فرد کو قانون کے کٹہرے میں لائیں گے۔
