حیدرآباد: تلنگانہ محکمہ صحت نے عوام سے اپیل کی ہے کہ وہ ہر جمعہ کو [en]Friday Dry Day[/en] کے طور پر منائیں تاکہ ڈینگو پھیلانے والے مچھروں کی افزائش کو روکا جا سکے، خاص طور پر ایسے موسم میں جو ان کے لیے سازگار ہے۔ حکام نے گھروں، دفاتر، چھتوں اور اطراف کے علاقوں میں ہر ہفتے جمع پانی کو صاف کرنے کی سختی سے ہدایت دی ہے۔
محکمہ صحت کے مطابق ڈینگو کے مچھر دن کے وقت سرگرم ہوتے ہیں، اس لیے کھڑکیاں اور دروازے بند رکھنا، مچھر دانی اور جال لگانا، بچوں کے بستر اور جھولے مچھر جالی سے ڈھانپنا نہایت ضروری ہے۔ عوام کو مشورہ دیا گیا ہے کہ وہ مچھر بھگانے والی کریمیں استعمال کریں اور نکاسی آب کے نظام اور پائپ لائن کی صفائی کو یقینی بنائیں تاکہ پانی جمع نہ ہو۔
پانی سے پھیلنے والی بیماریوں جیسے گیسٹرو، یرقان اور ٹائیفائیڈ کے بڑھتے ہوئے واقعات کے پیش نظر محکمہ نے مشورہ دیا ہے کہ صرف ابلا ہوا یا فلٹر شدہ پانی استعمال کریں، کھانے سے پہلے اور بعد میں ہاتھ دھوئیں، اور باسی کھانے سے گریز کریں۔
محکمہ صحت کے ڈائریکٹر ڈاکٹر بی رویندر نائیک نے ہوا سے پھیلنے والی بیماریوں، وائرل بخار اور فلو کے بڑھتے ہوئے خطرات پر بھی تشویش ظاہر کی ہے۔ انہوں نے مشورہ دیا کہ کھانسی یا چھینک کے وقت منہ ڈھانپیں، مصافحہ سے پرہیز کریں، اور بنیادی صفائی کے اصولوں پر عمل کریں تاکہ بیماریوں کے پھیلاؤ کو روکا جا سکے۔
ڈاکٹر نائیک نے کہا کہ یہ سادہ احتیاطی تدابیر بڑے امراض سے بچا سکتی ہیں، اور عوام کو صحت مند طرز زندگی اپنانے کی اپیل کی۔
