تلنگانہ ہائی کورٹ نے میڈی گڈہ بیاریج دھنسنے کے معاملے میں سابق چیف منسٹر کے سی آر اور سابق وزیر ہریش راؤ کی درخواست پر فیصلہ محفوظ کرلیا۔ دونوں رہنماؤں نے بھوپال پلی ڈسٹرکٹ کورٹ کے نوٹسوں کو چیلنج کیا تھا۔
حیدرآباد: میڈی گڈہ بیاریج دھنسنے کے معاملے میں تلنگانہ ہائی کورٹ نے سابق چیف منسٹر کے چندر شیکھر راؤ (کے سی آر) اور سابق وزیر ہریش راؤ کی جانب سے دائر درخواست پر اپنا فیصلہ محفوظ کرلیا۔
یہ معاملہ اس وقت شروع ہوا جب بھوپال پلی ڈسٹرکٹ کورٹ میں راجہ لنگا مورتی نامی شخص نے ایک درخواست دائر کی، جس کے بعد عدالت نے کے سی آر اور ہریش راؤ کو نوٹسیں جاری کیں۔ تاہم، دونوں رہنماؤں نے ان نوٹسوں کو چیلنج کرتے ہوئے ہائی کورٹ سے رجوع کیا۔
حالیہ دنوں میں اس کیس میں غیر متوقع موڑ آیا، جب درخواست گزار راجہ لنگا مورتی کا قتل کردیا گیا۔ ہائی کورٹ نے سماعت کے دوران اس نکتے پر سوال اٹھایا کہ آیا شکایت کنندہ کی موت کے بعد بھی یہ مقدمہ برقرار رہ سکتا ہے۔
سرکاری وکیل نے بحث کرتے ہوئے موقف اختیار کیا کہ درخواست گزار کی موت کے باوجود یہ معاملہ قانونی طور پر آگے بڑھ سکتا ہے۔ دونوں فریقین کے دلائل سننے کے بعد، ہائی کورٹ نے فیصلہ محفوظ کرلیا اور جلد ہی اپنا حکم جاری کرے گی۔
