حیدرآباد: ملک پیٹ پولیس نے منگل کے روز 9 افراد کو گرفتار کر لیا جو [en]Posing as Cops[/en] یعنی فرضی ٹاسک فورس افسران کا روپ دھار کر ایک ٹرسٹ کے منتظم کو 50 لاکھ روپئے کا چونا لگا چکے تھے۔
سرکل انسپکٹر نریش کے مطابق، منچریال کے رہنے والے وجے کمار، جو ’سیوا رتھ ٹرسٹ‘ چلاتے ہیں، سے حال ہی میں دو افراد، نریندر اور سرینواس، نے ملاقات کی اور خود کو ایک کارپوریٹ کمپنی کے نمائندے ظاہر کیا۔ انہوں نے دعویٰ کیا کہ ان کی کمپنی کے CSR اسکیم کے تحت ایک کروڑ روپئے ٹرسٹ کے اکاؤنٹ میں جمع کیے جائیں گے، بشرطیکہ وجے کمار انہیں پیشگی 50 لاکھ روپئے ادا کریں۔
وجے کمار نے اس پیشکش پر بھروسا کرتے ہوئے 4 جولائی کو موسارم باغ میں واقع اپنے رشتہ دار کے گھر پر رقم حوالے کی۔ رقم کے تبادلے کے دوران تین نامعلوم افراد اچانک پہنچے اور خود کو ٹاسک فورس پولیس ظاہر کرتے ہوئے وہاں موجود تمام افراد کو دھمکایا اور رقم لے کر فرار ہو گئے۔
شکایت موصول ہونے کے بعد، ملک پیٹ پولیس اور ساؤتھ ایسٹ زون ٹاسک فورس نے پانچ خصوصی ٹیمیں تشکیل دیں۔ سی سی ٹی وی فوٹیج اور کال ڈیٹا کی مدد سے ملزمین کی شناخت کی گئی۔
گرفتار افراد میں شامل ہیں: رویندر گوڑ (فارما تاجر، اولڈ بوئن پلی)، ایگالا رمنا (ریئل اسٹیٹ ایجنٹ، وشاکھاپٹنم)، کولی لنکن بابو (نجی ملازم، سکندرآباد)، پننتی نوین ریڈی (رنگا ریڈی)، سید دستگیر قادری (عیدی بازار)، گجیلی وجے چندرا (ریئل اسٹیٹ، بوئن پلی)، درشنم مرلی (مادنا پیٹ)، اشوک گوڑ (نجی ملازم، رنگا ریڈی) اور آولا رملو (ریپڈو ڈرائیور، سعیدآباد)۔
پولیس نے ان کے قبضے سے 6.94 لاکھ نقدی، آٹھ موبائل فون اور تین موٹر سائیکلیں ضبط کیں۔ چار اہم ملزمین—محسن عرف واحد، سمیع، ایاز دیشمکھ اور ساحل—تاحال فرار ہیں، جن کی تلاش جاری ہے۔
