حیدرآباد: ایل بی نگر LB Nagarمیں اتوار کی رات دیر گئے ایک دلخراش واقعہ پیش آیا، جہاں سڑک کنارے سو رہے دو افراد پر ہائی ٹینشن برقی تار گرنے سےوہ زندہ جل گئے۔ پولیس کے مطابق ہلاک ہونے والے دونوں افراد کی شناخت تاحال نہیں ہو سکی ہے، امکان ہے کہ وہ بھکاری تھے۔
یہ المناک واقعہ ساگر رنگ روڈ پر واقع رینوکا ایلماں مندر کے قریب پیش آیا، جہاں ایک نامعلوم گاڑی نے برقی کھمبے کو ٹکر مار دی، جس کے نتیجے میں 11 کے وی برقی تار ٹوٹ کر نیچے گر پڑا۔ برقی تار نے سڑک پر سوئے دو افراد کو اپنی لپیٹ میں لے لیا، جس کے باعث وہ جھلس کر موقع پر ہی ہلاک ہو گئے۔ ایک آوارہ کتا بھی اس واقعے میں جھلس کر ہلاک ہو گیا۔
پولیس اور برقی محکمے کے عملہ نے فوری طور پر موقع پر پہنچ کر بجلی کی سربراہی منقطع کی اور حالات پر قابو پایا۔ دونوں لاشوں کو عثمانیہ اسپتال کے مردہ خانے منتقل کر دیا گیا ہے، اور ان کی شناخت کے لیے کوششیں جاری ہیں۔
ابتدائی تفتیش کے مطابق برقی کھمبے پر لگا پولیمر پن انسولیٹر ممکنہ طور پر ٹوٹنے سے تار نیچے گرا۔ محکمہ برقی کے عہدیدار حادثے کی اصل وجہ جاننے کے لیے مزید معائنہ کر رہے ہیں۔
ایل بی نگر کے رکن اسمبلی دیوریڈی سدھیر ریڈی نے جائے حادثہ کا دورہ کیا اور ابتدائی طور پر اسے محکمہ برقی کی لاپرواہی قرار دیا۔ انہوں نے کہا کہ عوامی سلامتی کے لیے برقی نظام کی نگرانی میں غفلت ناقابل قبول ہے۔
