حیدرآباد: تلنگانہ کے سرکاری اسکولوں میں تعلیم کو جدید خطوط پر استوار کرتے ہوئے حکومت نے [en]Schools Adopt AI[/en] کے تحت مصنوعی ذہانت کو تدریسی نظام میں شامل کرنے کا آغاز کر دیا ہے، جس کا مقصد دور دراز علاقوں میں بھی طلباء کو معیاری ڈیجیٹل تعلیم فراہم کرنا ہے۔
آئی ٹی اور صنعتوں کے وزیر ڈی شری دھر بابو کی شمولیتی ڈیجیٹل تعلیم کے وژن کے تحت یہ اقدام اب عملی شکل اختیار کر رہا ہے۔ ضلع پداپلی کے آدیواسی سری رام پور جیسے دیہات میں واقع زیڈ پی ہائی اسکول میں اب AI سے لیس کلاس رومز فعال ہو چکے ہیں، جہاں ٹی-فائبر اسکیم کے ذریعے تیز رفتار انٹرنیٹ کی سہولت فراہم کی گئی ہے۔
کلاس روم میں Perplexity.ai جیسے مفت AI-پاورڈ سرچ ٹول کا استعمال کیا جا رہا ہے، جس کے ذریعے طلباء سوالات پوچھ سکتے ہیں، مفاہمت حاصل کر سکتے ہیں اور اسباق میں اضافی مواد تک رسائی حاصل کر رہے ہیں۔ اسکول عملے اور طلباء میں اس اقدام کے بعد نئی دلچسپی اور جوش و خروش دیکھنے کو ملا ہے، خصوصاً ان طلباء میں جنہوں نے پہلے کبھی انٹرنیٹ پر مبنی تعلیم کا تجربہ نہیں کیا تھا۔
ٹی-فائبر کے منیجنگ ڈائریکٹر وینو پرساد پنیرو ،اس منصوبے کی نگرانی کر رہے ہیں۔ انہوں نے حال ہی میں سان فرانسسکو کا دورہ کیا، جہاں انہوں نے تیلگو نژاد ٹیک کاروباری حضرات سے اسکول کنیکٹیویٹی کی توسیع کے لیے CSR تعاون حاصل کرنے کی اپیل کی۔
Perplexity AI کے سی ای او اروند سرینیواس نے سوشیل میڈیا پر اس پیش رفت کو “قابلِ فخر لمحہ” قرار دیا اور کہا کہ یہ اقدام عوامی تعلیم میں AI کے ممکنات کو اجاگر کرتا ہے۔ یاد رہے کہ انہوں نے وزیر شری دھر بابو سے ان کے امریکہ دورے کے دوران ملاقات کر کے تلنگانہ کی ڈیجیٹل برابری کی کوششوں پر تبادلہ خیال کیا تھا۔
ریاستی حکومت کا منصوبہ ہے کہ 26,000 دیہی اسکولوں کو انٹرنیٹ سے جوڑا جائے، جس سے تلنگانہ کے تعلیمی منظرنامے میں ایک انقلابی تبدیلی کی امید کی جا رہی ہے۔
