حیدرآباد: ریلوے بورڈ نے وندے بھارت ٹرینوں کے کوچ تیار کرنے کے لیے تلنگانہ کے ضلع ورنگل کے قاضی پیٹ میں زیر تعمیر ریل کوچ فیکٹری کو منظوری دے دی ہے۔ [en]Vande Bharat Coach[/en] کی تیاری کی یہ منظوری اصولی طور پر دی گئی ہے اور آئندہ دو ماہ میں باضابطہ احکام جاری ہونے کی توقع ہے۔
ریلوے ذرائع کے مطابق اس منصوبے کے تحت وندے بھارت ٹرینوں کے چیئر کار اور سلیپر ورژنز دونوں کی تیاری کا منصوبہ زیر غور ہے۔ ساؤتھ سنٹرل ریلوے کے چیف پی آر او چ راکیش سری دھر نے تصدیق کی کہ فیکٹری میں ابتدائی کام شروع ہو چکے ہیں۔
مرکزی حکومت نے قاضی پیٹ ریلوے کوچ فیکٹری کے لیے یونین بجٹ میں 521 کروڑ روپۓ مختص کیے ہیں۔ یہ فیکٹری اصل میں اُس وقت منظور کی گئی تھی جب تلنگانہ میں بی آر ایس کی حکومت تھی، جس کی قیادت کے چندر شیکھر راؤ کر رہے تھے۔
بی آر ایس قائدین کا دعویٰ ہے کہ انہوں نے بارہا مرکز سے نمائندگی کی جس کے نتیجے میں یہ اہم صنعتی منصوبہ منظور کیا گیا۔ پارٹی نے اس اقدام کا سہرا اپنے سر باندھتے ہوئے کہا ہے کہ اس فیکٹری سے ریاست کو صنعتی ترقی اور روزگار کے نئے مواقع حاصل ہوں گے۔
یہ فیصلہ نہ صرف تلنگانہ کے ریلوے انفراسٹرکچر کو فروغ دے گا بلکہ جنوبی ہند میں وندے بھارت ٹرینوں کی تیاری کا ایک بڑا مرکز بھی ثابت ہو سکتا ہے۔
