حیدرآباد: ملک بھر میں جھوٹی بم دھمکیوں کے بڑھتے واقعات کے دوران منگل کو ممبئی کے ساؤتھ بمبئی میں واقع بمبئی اسٹاک ایکسچینج کی فیروز ٹاور عمارت کو بھی نشانہ بنایا گیا۔ Hoax Bomb Threat کی اس اطلاع نے سیکیورٹی اداروں کو فوری حرکت میں لا دیا۔
دھمکی آمیز ای میل اسٹاک ایکسچینج کی سرکاری ویب سائٹ کے ذریعے موصول ہوئی، جس میں خود کو “کامریڈ پنرائی وجیئن” ظاہر کرنے والے شخص نے دعویٰ کیا کہ عمارت میں چار آر ڈی ایکس دھماکہ خیز آلات نصب کیے گئے ہیں، جو دوپہر 3 بجے پھٹیں گے۔ اطلاع ملتے ہی پولیس اور بم اسکواڈ موقع پر پہنچے، عمارت کو خالی کرایا گیا اور مکمل تلاشی شروع کی گئی۔
علاقے کو فوری طور پر محفوظ قرار دیا گیا اور بم ڈیٹیکشن و ڈسپوزل اسکواڈ نے کئی گھنٹوں تک عمارت کی مکمل جانچ کی، جس کے بعد ممبئی پولیس نے اعلان کیا کہ یہ دھمکی جھوٹی تھی۔ اس سلسلے میں بھارتیا نیایا سنہیتا کی متعلقہ دفعات کے تحت ماتا رام بائی مارگ پولیس اسٹیشن میں مقدمہ درج کر لیا گیا ہے۔ ای میل بھیجنے والے کی شناخت کے لیے سائبر ماہرین تحقیقات کر رہے ہیں۔
یہ واقعہ اس وقت پیش آیا جب ایک دن قبل دہلی اور امرتسر میں بھی متعدد بم کی جھوٹی دھمکیاں موصول ہوئیں۔ دہلی کے تین اسکولوں کو پیر کو مشابہ ای میلز موصول ہوئیں، تاہم سیکیورٹی ایجنسیوں نے کسی بھی مشتبہ شے کی موجودگی کی تردید کی۔
دوسری جانب امرتسر میں دربار صاحب اور لنگر ہال کو نشانہ بنانے کی دھمکی دی گئی۔ شیرو مانی گردوارہ پربندھک کمیٹی نے پولیس میں شکایت درج کروائی، جس کے بعد تلاشی لی گئی مگر کوئی مشتبہ مواد نہیں ملا۔
اس دھمکی کی مذمت کرتے ہوئے امرتسر کے رکن پارلیمنٹ گرچیت سنگھ اوجلا نے سوشل میڈیا پلیٹ فارم “ایکس” پر کہا کہ یہ صرف ایک مذہبی مقام کو دھمکی نہیں بلکہ امن، عقیدے اور انسانیت پر حملہ ہے۔
