Hyderabad: Telangana ke Medak district ke Kulcharam mandal ke gaon Variguntham mein Tuesday subah Congress SC cell ke district secretary Murali Anil ki laash mushtaba haalaat mein baramad hui.
28 saal ke Anil ki laash ke paas se police ne 4 goli ke shells baramad kiye, lekin abhi tak yeh tasdeeq nahi hui ke unhein goli lagi thi ya nahi. Unke daaye kandhe aur seene par khoon ke nishan maujood thay, jo kisi tashaddud ya firing ka nateeja ho sakte hain.
Ma’aloom hua hai ke Anil ne Monday raat Gandhi Bhavan mein Congress ke aik program mein shirkat ki thi aur uske baad apni gaari mein apne gaon Paithara wapas ja rahe thay jab yeh waqia pesh aaya.
Ittila milne par police moqa par pohanchi aur laash ko Medak ke sarkari hospital muntakil kar diya gaya jahan post-mortem ke liye bheja gaya hai. Unki maut ne ilaqay mein khauf o hiras paida kar diya hai.
Congress ke chand rehnuma bhi hospital pohanche aur case ke hawalay se maloomat hasil ki. Police ne tahqiqat ka aghaaz kar diya hai aur har pehlu se mamlay ki jaanch jari hai.
