حیدرآباد: سائبرآباد پولیس نے جمعرات کے روز اپنے کمشنریٹ احاطے میں ایک وسیع پیمانے کی Fire Mock Drill کا انعقاد کیا، جس کا مقصد ہنگامی حالات سے نمٹنے کی صلاحیتوں کو مضبوط بنانا اور حفاظتی ضوابط پر عمل درآمد کو یقینی بنانا تھا۔ یہ مشق تلنگانہ اسٹیٹ فائر ڈیپارٹمنٹ کے تعاون سے انجام دی گئی۔
مشق کے دوران مادھاپور اسٹیشن کے فائر آفیسر انجنیلو دودلا نے براہِ راست مظاہرہ پیش کیا، جس میں مختلف اقسام کی آتشزدگی کے دوران کیے جانے والے اقدامات، فائر سیفٹی آلات کے استعمال اور محفوظ انخلاء کے طریقہ کار کی تفصیلات فراہم کی گئیں۔
ڈرل کا آغاز فائر الارم سے ہوا، جس کے ساتھ ہی کمشنریٹ آفس کے تمام ملازمین نے فوری طور پر مخصوص راستوں سے نکل کر قومی پرچم کے قریب قائم ’اسمبلی پوائنٹ‘ پر اجتماع کیا۔ اس عمل کی نگرانی تربیت یافتہ فائر مارشلز نے کی۔
کمشنر پولیس اویناش موہنتی، آئی پی ایس، اور جوائنٹ کمشنر ڈاکٹر گجاراؤ بھوپال، آئی پی ایس، نے اس مشق کی نگرانی کی اور بین الاداراتی ہم آہنگی اور ذاتی تیاری کی اہمیت پر زور دیا۔
اس مشق میں ٹریفک، سائبر کرائم، شی ٹیمز، اسپیشل برانچ، اکنامک آفینس وِنگ، بم اسکواڈ، اور سی اے آر ہیڈکوارٹر کے عملے نے فعال طور پر حصہ لیا۔ ہنگامی نظام جیسے فائر الارم، لفٹ سرکٹ بریکرز اور پبلک ایڈریس سسٹم کو اسٹینڈرڈ آپریٹنگ پروسیجرز کے مطابق فعال کیا گیا۔
فرضی ریسکیو آپریشنز نے مشق کو مزید حقیقت کے قریب تر بنایا اور ہائی رسک صورتحال سے نمٹنے کے لیے طریقہ کار کو مؤثر طریقے سے دہرایا گیا۔
اس موقع پر موجود سینئر افسران میں ڈی سی پی کرائمز اے متیام ریڈی، ڈی سی پی روڈ سیفٹی ایل سی نائیک، ڈی سی پی اسپیشل برانچ سائی شری، ڈی سی پی ویمن اینڈ چائلڈ سیفٹی سروجنا کرنم، اور اے ڈی سی پی ایڈمنسٹریشن روی چندن ریڈی شامل تھے۔ تلنگانہ فائر سروسز کے اسٹاف، بشمول ایس ایف اوز انجنیلو دودلا، پرشانت، ٹرینی ایس ایف او گوپال اور مادھاپور اسٹیشن کے دیگر اہلکار بھی موجود تھے۔
