حیدرآباد: کمشنر پولیس و ایڈیشنل ڈسٹرکٹ مجسٹریٹ (ایگزیکیٹیو) سی وی آنند، آئی پی ایس نے جمعہ کو پرانی حویلی کے کوتوال ہاؤس میں ایگزیکٹیو کورٹ سیشن منعقد کیا، جس میں جنوبی، جنوب مشرقی اور جنوب مغربی زونز میں بڑھتی ہوئی گینگز کی رقابتوں پر سخت تشویش ظاہر کی گئی۔
سینئر پولیس افسران کی موجودگی میں آٹھ متحرک گینگس کے خلاف تفصیلی رپورٹس پیش کی گئیں، جن میں قتل، اقدام قتل اور مسلسل جھگڑوں کے معاملات شامل ہیں۔ یہ رقابتیں کئی پولیس اسٹیشن حدود میں پھیلی ہوئی ہیں اور ان کی جڑیں ذاتی دشمنیوں میں پیوستہ ہیں۔
اہم معاملات درج ذیل ہیں:
- میرچوک پولیس اسٹیشن (جنوبی زون): سید عبدالقادر عرف افروز اور سید مرتضیٰ علی باقری کے گروپوں میں تصادم، جس کا آغاز نجم علی کے قتل سے ہوا۔
- کالا پتھر پولیس اسٹیشن (جنوبی زون): محمد اسد اور محمد قادر حسین عرف چھوٹا اشفاق کے درمیان جھگڑا، سید فخرالدین کے قتل سے جڑا۔
- بنڈلہ گوڑہ پولیس اسٹیشن (جنوب مشرقی زون): کالا عمران اور قدیر خان کی ہلاکتوں کے بعد 2018 سے جاری رقابت۔
- کنچن باغ پولیس اسٹیشن (جنوب مشرقی زون): محمد الیاس اور بابا شنگٹے گروپوں کے درمیان پرتشدد جھڑپ، ویشال شنگٹے کے اغوا اور قتل سے منسلک۔
- سنتوش نگر پولیس اسٹیشن (جنوب مشرقی زون): منشیات سے متعلق معاملے میں سابق اتحادی سید عمران عرف ہنومان عمران اور سید عتیق کے درمیان کشیدگی۔
- منگل ہاٹ پولیس اسٹیشن (جنوب مغربی زون): منموہن سنگھ اور سریندر سنگھ عرف سُرّو کے گروپوں کے درمیان حملہ۔
- آصف نگر پولیس اسٹیشن (جنوب مغربی زون): سید طاہر اور محمد اعظم شریف عرف اججو کے گینگز کے درمیان جوابی قتل۔
- گولکنڈہ پولیس اسٹیشن (جنوب مغربی زون): دو لاکھ روپئے کے تنازعہ اور غیر قانونی اسلحے کی بنیاد پر احمد علی خان عرف اشرف عاشو سے جھگڑا۔
سی وی آنند نے تمام فریقین کو انفرادی طور پر سنا اور سخت وارننگ دی کہ اگر تشدد جاری رہا تو شہر بدر کیے جانے سمیت سخت کارروائی عمل میں لائی جائے گی۔ انہوں نے مشورہ دیا کہ گینگز اپنی دشمنیاں خاندان اور برادری کے بزرگوں کی مداخلت سے ختم کریں۔
انہوں نے بی این ایس ایس 2023 کی دفعہ 126 کا حوالہ دیتے ہوئے کہا کہ امن عامہ کے لیے خطرہ بننے والوں کو بانڈ پر لیا جا سکتا ہے۔
اجلاس میں ڈی سی پی اسپیشل برانچ اپوروا راؤ، ڈی سی پی ساؤتھ اسنیہا مہرا، ڈی سی پی ساؤتھ ایسٹ ایس چیتنیا کمار، اور ڈی سی پی ساؤتھ ویسٹ چندر موہن شریک تھے۔
