احمد آباد: Air India کی ایک ڈریم لائنر پرواز آج دوپہر احمد آباد میں المناک حادثے کا شکار ہو گئی، جس کے نتیجے میں 100 سے زائد افراد کے جاں بحق ہونے کا اندیشہ ظاہر کیا جا رہا ہے۔ ابتدائی اطلاعات کے مطابق حادثے کے فوراً بعد علاقے میں افراتفری پھیل گئی، جب کہ درجنوں افراد زخمی ہوئے ہیں۔ حکام نے تاحال سرکاری طور پر ہلاکتوں کی حتمی تعداد جاری نہیں کی۔
پرواز AI171، جو بوئنگ 787 (رجسٹریشن VT-ANB) پر مشتمل تھی، سردار ولبھ بھائی پٹیل انٹرنیشنل ایئرپورٹ سے دوپہر 1:38 بجے لندن کے لیے روانہ ہوئی تھی۔ پرواز کے صرف پانچ منٹ بعد ہی طیارہ آسمان سے نیچے آ گرا اور شہر کے گنجان آباد میگھن نگر علاقے میں گر کر تباہ ہو گیا، جہاں دھواں اور آگ کے شعلے دور دور تک دکھائی دیے۔
عینی شاہدین نے ایک زوردار دھماکے، آگ اور دھویں کے گہرے بادلوں کی منظرکشی کی، جس نے پورے علاقے کو ہلا کر رکھ دیا۔ طیارے میں کل 242 افراد سوار تھے، جن میں 169 بھارتی، 53 برطانوی، 6 پرتگالی شہری اور عملے کے 12 افراد شامل تھے۔
شہر کے فائر ڈیپارٹمنٹ نے پانچ یونٹس فوری طور پر جائے حادثہ پر بھیجے، جب کہ دیگر ایمرجنسی ادارے بھی متحرک ہو گئے۔ آگ بجھانے اور زخمیوں کو نکالنے کا عمل فوری طور پر شروع کر دیا گیا۔
🚨Caught on Camera: Passenger plane crashes near Ahmedabad Airport with 242 on board. Rescue ops in full swing. More updates to follow.#AhmedabadCrash #PlaneCrash #BreakingNews #CaughtOnCam #AviationAccident pic.twitter.com/Po4u0uakrF
— Hyderabad News Hunt (@HyderabadNewsH) June 12, 2025
فلائٹ کی قیادت کیپٹن سميت سبھروال اور فرسٹ آفیسر کلائیو کندر کر رہے تھے۔ حکام کے مطابق کئی مسافروں کے ہلاک ہونے کا خدشہ ہے جب کہ دیگر شدید زخمی ہیں۔ کئی زخمیوں کو قریبی اسپتالوں میں منتقل کر دیا گیا ہے۔
وزیر اعظم نریندر مودی کو حادثے سے فوری طور پر آگاہ کیا گیا، جنہوں نے وزیر داخلہ امیت شاہ سے رابطہ کیا۔ امیت شاہ نے گجرات کے وزیر اعلیٰ، وزیر داخلہ، اور احمد آباد پولیس کمشنر سے بات کر کے مکمل مرکزی امداد فراہم کرنے کی یقین دہانی کرائی۔
ائرپورٹ اتھارٹی نے واقعے کی داخلی تفتیش شروع کر دی ہے، جب کہ DGCA اور تکنیکی ماہرین کی ٹیم جائے حادثہ پر شواہد اکٹھا کر رہی ہے۔ حادثے کی اصل وجوہات کا تاحال تعین نہیں ہو سکا۔
