حیدرآباد: وزیراعظم نریندر مودی 22 مئی کو Begumpet Railway Station کے ازسرنو ترقی دیے گئے نئے ڈھانچے کا ورچوئل طریقے سے افتتاح کریں گے۔ اسی دن وہ کریم نگر اور ورنگل ریلوے اسٹیشنز کا بھی افتتاح کریں گے جنہیں امرت بھارت اسٹیشن اسکیم کے تحت جدید سہولتوں سے آراستہ کیا گیا ہے۔
بیگم پیٹ ریلوے اسٹیشن کو عصری ٹرانزٹ ہب کے طور پر ترقی دی گئی ہے، جس پر 26.55 کروڑ روپئے کا تخمینی خرچ آیا ہے۔ ساوتھ سنٹرل ریلوے کے حکام کے مطابق اسٹیشن کے اگلے حصے میں مسافر دوست خصوصیات شامل کی گئی ہیں جیسے لفٹس، ایکسلیٹرز، وسیع ویٹنگ ہالس، جدید بیت الخلاء اور معذور افراد کے لیے مخصوص سہولتیں۔
ساوتھ سنٹرل ریلوے کے چیف پی آر او سریدھر نے بتایا کہ اسٹیشن کی روشنی، لینڈ اسکیپنگ اور دیگر سہولیات میں بھی بہتری لائی گئی ہے تاکہ مسافرین کو بہتر تجربہ فراہم کیا جا سکے۔ ایک خاص بات یہ ہے کہ بیگم پیٹ ریلوے اسٹیشن کو مکمل طور پر خواتین اسٹاف کے ذریعہ چلایا جائے گا، جن میں اسٹیشن ماسٹر، ٹکٹ کلرک، آر پی ایف کانسٹبلس اور بکنگ عملہ شامل ہیں۔
ریلوے عہدیداروں نے مزید کہا کہ اسٹیشن میں 2 لفٹس، 4 ایکسلیٹرز، پلیٹ فارم شیلٹرس اور مسافرین کی سہولت کے لیے سائن بورڈس نصب کیے گئے ہیں۔ ایک مخصوص نگرانی نظام کے ذریعے خواتین مسافروں کی سلامتی کو یقینی بنایا جائے گا۔
بیگم پیٹ ریلوے اسٹیشن روزانہ تقریباً 15 ہزار مسافروں کو خدمات فراہم کرتا ہے اور یہ سکندرآباد، حیدرآباد اور کاچی گوڑہ کے بعد سب سے مصروف سب اربن ریلوے اسٹیشنز میں شمار ہوتا ہے۔ ریلوے حکام کا کہنا ہے کہ اس اسٹیشن کی ازسرنو ترقی صرف انفراسٹرکچر کی سطح پر نہیں، بلکہ یہ اقدام مسافرین کے آرام اور سلامتی کو مدنظر رکھتے ہوئے کیا گیا ہے۔
