حیدرآباد: سابق وزیر و بی آر ایس لیڈر ہریش راؤ نے کہا ہے کہ ملک کی سرحدوں پر جاری Border Tension کے دوران نوجوان لڑکوں اور لڑکیوں کو قربانی کیلئے تیار رہنا چاہئے۔ انہوں نے آج صبح سورارم میں سپاہیوں کے ساتھ اظہارِ یکجہتی کے طور پر منعقدہ ایک ریلی سے خطاب کرتے ہوئے ان خیالات کا اظہار کیا۔
ہریش راؤ نے کہا کہ صرف نام پوچھ کر بے قصور سیاحوں کو دہشت گردوں کے ہاتھوں قتل کیا جانا ایک ایسا واقعہ ہے جس نے پورے ملک کے عوام کے دلوں کو جھنجھوڑ کر رکھ دیا ہے۔ انہوں نے کہا کہ ایسے سفاک واقعات کے خلاف ملک کے نوجوانوں کو بیدار ہونا چاہئے اور قربانی کے جذبے کے ساتھ ملک کی حفاظت کے لیے ہمہ وقت تیار رہنا چاہئے۔
سپاہیوں کی بہادری ملک کی طاقت ہے: ہریش راؤ
بی آر ایس لیڈر نے کہا کہ سپاہیوں کی بہادری اور قربانی ہی ملک کی اصل طاقت ہے، اور ان کی بے لوث خدمات پوری قوم کے لیے باعث فخر ہیں۔ انہوں نے زور دے کر کہا کہ فوجی خاندانوں کی دیکھ بھال اور حفاظت ملک کے ہر شہری کی ذمہ داری ہے اور ان کی فلاح و بہبود کو اپنی آنکھوں کی طرح عزیز رکھنا چاہئے۔
ہریش راؤ نے کہا کہ ملک کی سلامتی سب سے مقدم ہے اور اگر ملک پر کوئی حملہ ہوتا ہے تو اس کے جواب میں دہشت گردوں پر جوابی کارروائی ایک مناسب قدم ہے۔ انہوں نے اس بات پر زور دیا کہ قومی مفادات کے تحفظ کیلئے ہر شہری کو اپنا کردار ادا کرنا ہوگا۔
ریلی میں شریک عوام نے فوجی جوانوں کے تئیں یکجہتی کا مظاہرہ کیا اور ان کی قربانیوں کو خراج تحسین پیش کیا۔ ریلی کے دوران ہریش راؤ نے کہا کہ موجودہ حالات میں ہر فرد کو ملک کے دفاع میں اپنا حصہ ڈالنے کے لیے تیار رہنا چاہئے، خاص طور پر نوجوان نسل کو۔
There is a limit to patience. Years of tolerance must now give way to decisive action for our nation’s security. Proud to stand with our brave soldiers every Indian must be ready to support and sacrifice. Our strength lies in unity. Honoured to join the solidarity event at… pic.twitter.com/ItVGatayzS
— Harish Rao Thanneeru (@BRSHarish) May 10, 2025
