حیدرآباد: سکندرآباد ریلوے پولیس نے ایک سیریل Chain Snatcher کو گرفتار کرلیا جو مختلف ٹرینوں میں خواتین سے زیورات چھیننے میں ملوث تھا۔ پولیس نے اس کے قبضے سے تقریباً 3 لاکھ روپئے مالیت کے سونے کے زیورات برآمد کیے۔
ملزم کی شناخت موتی لال ریڈپا پوار عرف موتی لال (عمر 24 سال) کے طور پر ہوئی ہے، جو ریاست کرناٹک کے رائچور ضلع سے تعلق رکھتا ہے۔ ابتدا میں پونے اور مہاراشٹرا میں ملازمت کرنے کے بعد، آمدنی ناکافی ہونے پر اس نے جرائم کا راستہ اختیار کیا۔
پولیس کے مطابق، موتی لال کے خلاف 30 سے زائد املاک سے متعلق مقدمات درج ہیں، اور حال ہی میں وہ ضمانت پر رہا ہوا تھا۔ اس نے دوبارہ وارداتیں اس لیے شروع کیں تاکہ اپنے ساتھیوں کی قانونی فیس ادا کر سکے جو جیل میں ہیں۔
ملزم نے شہر کے لاجوں میں عارضی قیام کے دوران ٹرینوں میں سفر کرنے والی خواتین کو نشانہ بنایا۔ 14 جولائی کو پالناڈو ایکسپریس اور 19 جولائی کو ایم ایم ٹی ایس ٹرین میں خواتین کی زنجیروں کو چھیننے کے واقعات سامنے آئے۔
شکایات کی بنیاد پر ریلوے پولیس نے تحقیقات کا آغاز کیا اور مشتبہ حرکات پر 21 جولائی کو سکندرآباد ریلوے اسٹیشن پر موتی لال کو گرفتار کیا۔ تفتیش کے دوران اس نے اپنے جرم کا اعتراف کیا، اور اس کے قبضے سے 35 گرام طلائی زیورات برآمد کیے گئے۔
ریلوے ڈی ایس پی جاوید اور انسپکٹر سائی ایشور گوڑ نے ایک پریس کانفرنس میں کیس کی تفصیلات بیان کیں۔
