حیدرآباد: ملک بھر میں ایک بار پھر Covid-19 کے کیسوں میں اضافہ ریکارڈ کیا جا رہا ہے، اور مجموعی فعال کیسوں کی تعداد بڑھ کر 3,783 تک پہنچ چکی ہے۔ محکمہ صحت کے مطابق سب سے زیادہ ریاست کیرالا متاثر ہے، جہاں 1,400 فعال کیس موجود ہیں، اس کے بعد مہاراشٹرا میں 485 اور دہلی میں 436 کیس درج کیے گئے ہیں۔
گزشتہ 48 گھنٹوں کے دوران ملک بھر میں 1,000 سے زائد نئے کیس سامنے آئے ہیں، جس نے صحت کے حکام کو تشویش میں مبتلا کر دیا ہے۔ ماہرین نے عوام کو دوبارہ احتیاطی تدابیر اختیار کرنے کی ہدایت دی ہے۔
محکمہ صحت کی رپورٹ کے مطابق جنوری سے اب تک کووِڈ سے متعلق 28 اموات ہو چکی ہیں، جن میں سے 21 اموات صرف پچھلے دو دنوں میں ہوئیں۔ ہفتہ کے روز بنگلور میں 63 سالہ شخص وائرس کا شکار ہو گیا، حالانکہ اس نے ویکسین کی دونوں خوراکیں اور بوسٹر ڈوز بھی لے رکھی تھی۔ دہلی سے بھی 60 سالہ مریض کی ہلاکت کی اطلاع ملی ہے۔
اب تک مہاراشٹرا اور کیرالا دونوں ریاستوں سے 7-7 اموات کی تصدیق ہو چکی ہے، جس سے یہ دونوں علاقے اموات کے لحاظ سے سب سے زیادہ متاثر قرار دیے جا رہے ہیں۔
اس صورتحال کے پیش نظر کرناٹک حکومت نے ہفتہ کے روز ایک پبلک ایڈوائزری جاری کی ہے، جس میں لوگوں کو ہدایت دی گئی ہے کہ وہ بھیڑ بھاڑ والے مقامات پر ماسک کا استعمال کریں، سماجی فاصلے کا خیال رکھیں اور صفائی کے اصولوں پر سختی سے عمل کریں۔
دریں اثنا، بخار، کھانسی، سینے میں درد یا سانس لینے میں دشواری جیسے علامات والے افراد کو فوری طور پر ٹیسٹ کرانے کی تلقین کی گئی ہے تاکہ وائرس کے پھیلاؤ پر قابو پایا جا سکے۔
