Hyderabad: CPI Leader Chandu Naik Tuesday subah Hyderabad ke Malakpet ke Salivahana Nagar Park mein firing ka nishana banay. Attack mein unki spot par hi death ho gayi. Police ne attack ki tahqiqat shuru kar di hai.
Waqia subah 7:30 baje hua jab Chandu Naik park mein walk kar rahe thay. Swift car mein aaye 3 se 4 afraad ne pehle unki aankhon mein powder phenka aur phir unpar 6 rounds firing ki. Attack ke baad wo log moqa se farar ho gaye.
Moqa-e-wardaat par pohanch kar police ne CCTV cameras ka jaiza liya aur suspects ki pehchan ki koshish jaari hai. Firing ke baad logon mein dar aur afra tafri phail gayi aur park mein bhaag daur mach gayi.
Chandu Naik ka taluq Nagar Kurnool ke Balmur mandal ke Narsayipalli se hai. Police ne tasdeeq ki hai ke wo CPI ke state council member ke tor par farz ada kar rahe thay.
Unki wife ne Devaruppala ke CPI (ML) leader Rajesh par shaq zahir kiya hai. Police ne unki complaint par case register kar liya hai. Shanakht hone tak police is qatal ko land dispute se jor rahi hai. Tahqiqat jaari hai.
