حیدرآباد: راجندر نگر کے بُدویل علاقہ میں پیش آئے سنسنی خیز Double Murder Hyderabad کیس کی گتھی آخرکار تلنگانہ پولیس نے سلجھا لی ہے۔ پولیس کے مطابق ایک سابق ڈرائیور نے نوکری سے برخاست کیے جانے کی دشمنی میں ایک بزرگ جوڑے کو بہیمانہ طور پر قتل کر دیا۔
ملزم محمد شکیل سلمان اور اس کے ساتھی محمد مجیب الدین کو پولیس نے گرفتار کر لیا ہے۔ یہ دوہرا قتل گزشتہ جمعرات کو جَنَ چَیتنیہ کالونی میں واقع آربیس ریسیڈنسی کے فلیٹ نمبر 502 میں پیش آیا، جس نے پرسکون رہائشی علاقے کو ہلا کر رکھ دیا تھا۔
راجندر نگر ڈی سی پی چنتامنی شری نیواس کے مطابق مقتولین شیخ عبداللہ (عمر 70 سال)، اسٹیٹ بینک آف انڈیا کے ریٹائرڈ جنرل مینیجر، اور ان کی اہلیہ رضوانہ (عمر 65 سال)، جو سابق لکچرر تھیں، کچھ عرصہ قبل ریڈ ہلز سے اس فلیٹ میں منتقل ہوئے تھے۔
سلمان پہلے اس جوڑے کا ڈرائیور رہ چکا تھا، لیکن اس کے خراب رویے کی مسلسل شکایات کے بعد آٹھ ماہ قبل اسے برخاست کر دیا گیا۔ پولیس کا کہنا ہے کہ نوکری سے نکالے جانے کے بعد سلمان شدید ذہنی دباؤ اور غصے کا شکار ہو گیا، اور اس نے جوڑے سے بدلہ لینے کا فیصلہ کیا۔
انتقام کی سازش کے تحت سلمان نے اپنے دوست مجیب الدین سے 40,000 روپئے ادھار لیے اور اسے بھی اس منصوبے میں شامل کر لیا۔ 4 جون کو وہ پہلے ریڈ ہلز گئے، لیکن وہاں معلوم ہوا کہ جوڑا اب بُدویل منتقل ہو چکا ہے۔ اگلے دن شام 5 بجے کے قریب وہ آربیس ریسیڈنسی پہنچے۔
سلمان اور مجیب نے برقع اور ماسک پہن کر عمارت کے چوکیدار راجیش کو بتایا کہ “علی نے فارم سے بلایا ہے”۔ چوکیدار نے عبداللہ سے تصدیق کرنے کے بعد دونوں کو اندر جانے دیا۔
فلیٹ کے اندر داخل ہوتے ہی سلمان نے اپنے ساتھ لایا ہوا چاقو نکالا اور عبداللہ پر کئی وار کیے۔ اچانک حملے سے مجیب گھبرا گیا اور فرار ہو گیا۔ جب رضوانہ نے بیچ بچاؤ کی کوشش کی تو سلمان نے انہیں بھی چاقو مار کر ہلاک کر دیا۔
قتل کے بعد سلمان نے فلیٹ میں کچھ دیر قیام کیا، عبداللہ کی جیب سے صرف 600 روپئے لیے اور فرار ہو گیا۔
واقعے کے بعد پولیس نے فوری تحقیقات کا آغاز کیا اور سلمان و مجیب کو ٹریس کر کے گرفتار کر لیا۔ ان پر قتل کے دفعات کے تحت مقدمہ درج کر لیا گیا ہے۔
اس اہم پیش رفت میں اے سی پی تُلا شری نیواس، انسپکٹرز کاسترو اور پرشانت، سی سی ایس اور ایس او ٹی ٹیموں نے کلیدی کردار ادا کیا۔
