حیدرآباد: ایراگڈہ کے گورنمنٹ مینٹل ہیلتھ اسپتال میں مبینہ food poisoning کے ایک سنگین واقعے میں 70 سے زائد مریض شدید بیمار ہو گئے، جن میں سے ایک مریض، کرن نامی شخص، منگل کے روز جانبر نہ ہو سکا۔
اسپتال میں اس وقت افرا تفری مچ گئی جب درجنوں مریضوں نے قے اور شدید پیٹ درد کی شکایت شروع کی۔ عملہ فوری حرکت میں آیا، لیکن مریض ایک کے بعد ایک بے ہوش ہونے لگے۔ صورت حال بگڑنے پر دو نازک حالت کے مریضوں کو فوری طور پر عثمانیہ جنرل اسپتال منتقل کیا گیا، جہاں وہ تاحال انتہائی نگہداشت میں زیر علاج ہیں۔
کلکٹر انودیپ دوری شیٹی نے موقع پر پہنچ کر حالات کا جائزہ لیا، جب کہ عثمانیہ اسپتال سے ایک ماہر میڈیکل ٹیم 68 متاثرہ مریضوں کے علاج کے لیے روانہ کی گئی۔
وزیر صحت دامودھر راجا نرسمہا کو بھی صورت حال سے آگاہ کیا گیا ہے اور انہوں نے واقعے کی مکمل رپورٹ طلب کی ہے۔ حکام کے مطابق کھانے میں آلودگی اس واقعے کی ممکنہ وجہ ہو سکتی ہے، تاہم دیگر امکانات کو بھی نظر انداز نہیں کیا جا رہا۔
