حیدرآباد: سکندرآباد میں مقیم ایک ریٹائرڈ لیفٹیننٹ کرنل کے ساتھ [en]Fake Challan[/en] کے نام پر 1.2 لاکھ روپئے کا سائبر فراڈ پیش آیا، جس کی اطلاع پولیس نے منگل کے روز دی۔
سائبر کرائم کے اے سی پی شیوا ماروتھی کے مطابق، متاثرہ افسر کو 6 جولائی کو واٹس ایپ پر ایک پیغام موصول ہوا، جس میں دعویٰ کیا گیا کہ یہ ‘ای-پریواہن’ پورٹل سے ہے اور ان کی گاڑی پر ٹریفک قواعد کی خلاف ورزی پر 1000 روپئے کا جرمانہ عائد کیا گیا ہے۔
پیغام میں دی گئی لنک کو اصلی سمجھتے ہوئے افسر نے کلک کیا، جس کے چند ہی منٹوں میں ان کے اس بی آئی کریڈٹ کارڈ سے دو ٹرانزیکشنز کے ذریعے 1,20,409 روپئے نکال لیے گئے۔
فراڈ کا احساس ہونے پر انہوں نے فوری طور پر سائبر کرائم پولیس میں شکایت درج کروائی۔ پولیس نے مقدمہ درج کرتے ہوئے معاملے کی تفتیش شروع کر دی ہے۔
حکام نے عوام کو خبردار کیا ہے کہ وہ کسی بھی جرمانے یا ادائیگی سے متعلق مشتبہ لنکس پر کلک نہ کریں اور ایسی اطلاع ملنے پر تصدیق کے بغیر کوئی اقدام نہ کریں۔
