حیدرآباد: میرپیٹ کے سائی گنیش نگر کالونی میں ایک شدید [en]Fire Accident[/en] نے سنسنی پھیلا دی جب دوپہر کے وقت ایک ویلڈنگ شاپ میں اچانک آگ بھڑک اٹھی اور دیکھتے ہی دیکھتے قریبی کار مکینک اور ڈینٹنگ شاپس کو بھی اپنی لپیٹ میں لے لیا۔
عینی شاہدین کے مطابق آگ لگتے ہی علاقے میں دھوئیں کے گھنے بادل اور شعلے بلند ہونے لگے، جس سے رہائشی علاقوں میں خوف و ہراس پھیل گیا۔ مقامی افراد نے فوری طور پر فائر بریگیڈ اور پولیس کو اطلاع دی۔
فائر ڈیپارٹمنٹ کی جانب سے تین فائر ٹینڈرس جائے وقوعہ پر روانہ کیے گئے۔ فائر فائٹرز نے کئی گھنٹوں کی جدوجہد کے بعد آگ پر قابو پایا۔ پولیس کا ابتدائی خیال ہے کہ آگ ممکنہ طور پر شارٹ سرکٹ کے باعث لگی۔
میرپیٹ پولیس نے مقدمہ درج کر کے متاثرہ دکانوں میں موجود برقی نظام اور حفاظتی اقدامات کا معائنہ شروع کر دیا ہے تاکہ آگ لگنے کی اصل وجہ معلوم کی جا سکے۔ خوش قسمتی سے اس حادثے میں کوئی جانی نقصان نہیں ہوا۔
علاقہ مکینوں نے حکام سے مطالبہ کیا ہے کہ ایسی دکانوں میں فائر سیفٹی کے معیارات پر سختی سے عمل کروایا جائے اور باقاعدہ معائنے کیے جائیں تاکہ مستقبل میں ایسے واقعات سے بچا جا سکے۔
