حیدرآباد: شمس آباد کے اوٹ پلی گاؤں کے ڈائمنڈ اسٹیٹ کالونی میں واقع ایک رہائشی مکان پر [en]Ganja Cultivation[/en] کے الزام میں 49 سالہ شخص کو شمس آباد رورل پولیس نے گرفتار کرلیا۔
سرکل انسپکٹر نریندر ریڈی کے مطابق، پولیس کو اطلاع ملی تھی کہ مذکورہ شخص سبزیوں کے ساتھ ساتھ گانجہ کے پودے بھی اگا رہا ہے۔ اطلاع پر کارروائی کرتے ہوئے پولیس نے اس کے مکان پر چھاپہ مارا جہاں سبزیوں کے درمیان چھپائے گئے گانجہ کے کئی پودے پائے گئے۔
ملزم کی شناخت ترکشور سنگھ کے طور پر کی گئی جو بہار کے دربھنگہ ضلع سے تعلق رکھتا ہے۔ وہ کئی برس قبل شمس آباد منتقل ہوا تھا اور مدھورا نگر میں ایک چھوٹا سا کری پوائنٹ چلاتا تھا۔ گرفتاری کے وقت اس کی بیوی بمل سنگھ، بیٹا بنٹی سنگھ اور بیٹی روپالی سنگھ بھی مکان میں موجود تھے۔ مکان بمل سنگھ کے نام پر رجسٹرڈ ہے۔
تفتیش کے دوران ترکشور نے بتایا کہ وہ تمباکو چبانے کا عادی تھا۔ چار ماہ قبل اوٹ پلی کے او آر آر پل کے نیچے کچھ نامعلوم افراد سے ملا جنہوں نے اسے تمباکو سے زیادہ نشہ آور پتہ دیا۔ بعد ازاں اس نے باقاعدگی سے گانجہ استعمال کرنا شروع کیا اور پھر اسے گھر میں اگانے کا فیصلہ کیا تاکہ باہر سے خریدنے کی ضرورت نہ پڑے۔
ملزم نے اعتراف کیا کہ وہ گانجے کے پتے چبا کر نشہ کرتا تھا۔ پولیس نے اس کے خلاف مقدمہ درج کرتے ہوئے اسے عدالتی تحویل میں دے دیا۔
