حیدرآباد: وزیراعلیٰ اے ریونت ریڈی آج سکریٹریٹ میں Gig Workers Bill 2025 کا جائزہ لیں گے، جسے اسمبلی میں پیش کرنے کی تیاری کی جا رہی ہے۔ اجلاس سہ پہر 3 بجے منعقد ہوگا۔
یہ مجوزہ قانون گیگ معیشت سے وابستہ کارکنوں کے لیے قانونی فلاحی نظام قائم کرنے کا ہدف رکھتا ہے، جس کے تحت ایگریگیٹر پلیٹ فارمز کو ریاستی زیرانتظام فلاحی فنڈ میں لازمی طور پر حصہ دینا ہوگا۔ بل میں ریاست کی پشت پناہی سے سماجی تحفظ کی سہولیات، اور ڈیجیٹل پلیٹ فارمز پر قانونی عملدرآمد کی شقیں شامل ہیں۔ حالیہ دنوں اس مسودے کو عوامی رائے کے لیے جاری کیا گیا تھا۔
شام 5 بجے ایک الگ اجلاس میں تمام اضلاع کے کلکٹروں کے ساتھ خریف فصلوں کی کارکردگی کا جائزہ لیا جائے گا۔ عہدیدار کھاد خصوصاً یوریا کی فراہمی، مٹی کی جانچ کی کوریج، اور موسمی امراض سے فصلوں اور مزدوروں کے تحفظ کے اقدامات پر رپورٹس پیش کریں گے۔
وزیراعلیٰ ریاست بھر کے اہل خاندانوں کو دی جانے والی نئی راشن کارڈ اسکیم کی پیش رفت کا بھی جائزہ لیں گے، جو رواں ماہ کے آغاز میں شروع کی گئی تھی۔
دونوں اجلاسوں میں کابینی وزرا اور اعلیٰ انتظامی افسران شرکت کریں گے۔
