حیدرآباد: تلنگانہ ہائی کورٹ نے Group-1 appointments کے سلسلے میں جاری بھرتی کے عمل پر اہم ہدایات جاری کی ہیں، جس کے تحت منتخب امیدواروں کو تقرری کے احکامات جاری کرنے پر عارضی پابندی عائد کر دی گئی ہے۔
یہ حکم نامہ اُس وقت جاری کیا گیا جب بھرتی کے عمل میں بے قاعدگیوں کے الزامات پر متعدد درخواستیں عدالت میں داخل کی گئیں۔ اب تک اس معاملے سے متعلق 20 درخواستیں دائر کی جا چکی ہیں۔
عدالت نے واضح کیا ہے کہ جب تک تمام متعلقہ درخواستوں کی سماعت مکمل نہیں ہوتی، اُس وقت تک کسی بھی امیدوار کو تقرری کا حکم جاری نہیں کیا جائے گا۔ تاہم، عدالت نے اس بات کی اجازت دی ہے کہ اسناد کی تصدیق کا عمل جاری رکھا جا سکتا ہے۔
ریاستی حکومت کو ہدایت دی گئی ہے کہ وہ تقرری کے احکامات جاری کرنے یا پوسٹنگ کو قطعیت دینے سے گریز کرے، جب تک عدالت کی جانب سے کوئی حتمی فیصلہ نہ آ جائے۔
امکان ظاہر کیا جا رہا ہے کہ عدالتی کاروائی کے اگلے مرحلے میں بھرتی عمل کی شفافیت اور منصفانہ طریقہ کار کے حوالے سے اٹھائے گئے اعتراضات پر مزید تفصیل سے غور کیا جائے گا۔
