حیدرآباد: تلنگانہ میں Group-1 Irregularities کے باعث ہزاروں امیدوار شدید ذہنی دباؤ، بے چینی اور مایوسی کا شکار ہو چکے ہیں۔ سوشل میڈیا پر امیدواروں کی جانب سے بی آر ایس کے سینئر رہنما کے ٹی راما راؤ سے اپیل کی گئی ہے کہ وہ ان کی حمایت کریں اور وعدہ کریں کہ بی آر ایس کے دوبارہ اقتدار میں آنے پر ان بے ضابطگیوں کی مکمل تحقیقات کروائی جائیں گی۔
امیدواروں نے اپنے پیغام میں کہا کہ تین سال کی انتھک محنت، روزگار کی قربانی اور کیریئر کو داؤ پر لگا کر صرف ملک کی خدمت کے جذبے سے انہوں نے گروپ-1 کی تیاری کی تھی۔ مگر تلنگانہ پبلک سروس کمیشن کی مبینہ نااہلی کے باعث ان کے خواب چکنا چور ہو گئے ہیں۔
انہوں نے کے ٹی راما راؤ کو یاد دلاتے ہوئے کہا کہ جس طرح انہوں نے حیدرآباد سنٹرل یونیورسٹی کے مسئلے پر مضبوط مؤقف اختیار کیا ، اسی طرح اب بھی انہیں نوجوانوں کے حق میں کھڑے ہو کر Group-1 Irregularities کی مکمل اور غیر جانبدارانہ تحقیقات کے لیے سی بی آئی یا ایس آئی ٹی انکوائری کا اعلان کرنا چاہیے۔
پیغام میں مزید کہا گیا ہے کہ تلنگانہ کے نوجوان اپنے مستقبل کے تحفظ کے لیے انصاف چاہتے ہیں۔ امیدواروں کا کہنا ہے کہ اگر بی آر ایس یہ وعدہ کرے کہ وہ اقتدار میں آنے کے بعد ان بے ضابطگیوں پر عدالتی یا مرکزی جانچ کروائے گی، تو ہزاروں نوجوانوں کو ذہنی سکون اور نظام پر اعتماد واپس ملے گا۔
سوشل میڈیا پر یہ مہم تیزی سے پھیل رہی ہے، جس میں نوجوان حکومت سے شفافیت، جوابدہی اور انصاف کی مانگ کر رہے ہیں۔
