حیدرآباد: بی آر ایس لیڈر اور سدی پیٹ کے رکن اسمبلی Harish Rao نے تلنگانہ پردیش کانگریس کمیٹی کے صدر مہیش کمار گوڑ کے اس بیان پر سخت ردعمل ظاہر کیا ہے جس میں انہوں نے ہریش راؤ پر ’نچلی سطح کی سیاست‘کرنے کا الزام عائد کیا تھا۔
ہریش راؤ نے جواب دیتے ہوئے کہا کہ یہ افسوسناک ہے کہ کانگریس قائدین سیاسی مسائل کا جواں مردی سے سامنا کرنے کے بجائے الزام تراشی جیسے ہتھکنڈوں پر اتر آئے ہیں۔ انہوں نے زور دے کر کہا کہ بی آر ایس پر کتنے ہی جھوٹے الزامات لگائے جائیں، وہ سچائی کو تبدیل نہیں کر سکتے۔
انہوں نے کہا کہ کئی مواقع پر دوسری پارٹیوں کے قائدین سے ملاقاتیں ہوئیں، جیسے شادی یا جنازے کے مواقع پر، لیکن جیسا کہ الزام لگایا گیا ہے، کبھی کوئی ذاتی یا خفیہ ملاقات نہیں ہوئی۔ انہوں نے ان الزامات کو مکمل طور پر بے بنیاد قرار دیا۔
مہیش گوڑ پر براہِ راست تنقید کرتے ہوئے ہریش راؤ نے کہا کہ وہ اقدار اور اصولوں کی بنیاد پر سیاست کرتے ہیں اور انہیں اس طرح کی سطحی اور نچلی سیاست سے کوئی دلچسپی نہیں۔ انہوں نے کہا کہ کانگریس قائدین کو چاہیے کہ وہ عوام سے کیے گئے وعدوں پر عمل کریں نہ کہ سستی سیاسی حرکات سے عوام کی توجہ ہٹائیں۔
ہریش راؤ نے کہا کہ مہیش کمار گوڑ کو زیب دیتا ہے کہ وہ شائستگی کے ساتھ بات کریں اور انتخابات کے دوران کیے گئے ’چھ ضمانتوں‘ اور ’420 وعدوں‘کو پورا کرنے پر توجہ دیں، نہ کہ بے بنیاد الزامات میں وقت ضائع کریں۔
