حیدرآباد: تلنگانہ کرکٹ ایسوسی ایشن (ٹی سی اے) کے سکریٹری گرووا ریڈی نے اتوار کے روز سابق وزیر کے ٹی راما راؤ اور بی آر ایس ایم ایل سی کے کویتا پر حیدرآباد کرکٹ ایسوسی ایشن (ایچ سی اے) میں 170 کروڑ روپئے کے HCA Scam کا الزام لگاتے ہوئے کرائم انویسٹی گیشن ڈپارٹمنٹ اور انفورسمنٹ ڈائریکٹوریٹ سے تحقیقات کا مطالبہ کیا۔
میڈیا سے خطاب کرتے ہوئے گرووا ریڈی نے دعویٰ کیا کہ ایچ سی اے اسکام میں کے کویتا اور کے ٹی آر شامل ہیں اور سابق الیکشن آفیسر سمپت کمار کے ساتھ مل کر ریاستی کرکٹ نظام میں منظم بدعنوانی کو فروغ دیا گیا۔ انہوں نے الزام لگایا کہ دیہی علاقوں کے کھلاڑیوں کو جان بوجھ کر موقع نہیں دیا گیا اور گرمیوں کی مفت تربیتی کیمپس کو غیر قانونی طور پر کمرشلائز کیا گیا۔
ریڈی نے سوال اٹھایا کہ جگن موہن راؤ جیسے شخص، جن کا کوئی کرکٹنگ پس منظر نہیں، کو ایچ سی اے کا صدر کیسے بنایا گیا۔ انہوں نے کہا کہ اس تقرری کے پیچھے براہ راست کے ٹی آر اور کویتا کا ہاتھ تھا۔ بعض آئی اے ایس اور آئی پی ایس افسران پر بھی غیر فعال ایسوسی ایشنز کے حق میں ووٹ ڈالنے کا الزام عائد کیا۔
انہوں نے کہا کہ سی آئی ڈی تحقیقات میں فرضی کلبوں اور جعلی دستاویزات کا انکشاف ہوا ہے، جس کے نتیجے میں گرفتاریاں بھی ہو چکی ہیں۔ ریڈی نے ایچ سی اے کی ایگزیکٹو کمیٹی کو فوری تحلیل کرنے اور انتخابات کو منسوخ کرنے کا مطالبہ کیا۔
ریڈی کے مطابق، بھارتی کرکٹ کنٹرول بورڈ (بی سی سی آئی) کی طرف سے آئی پی ایل کے لیے جاری کردہ فنڈز میں سے تقریباً 170 کروڑ روپئے کا غلط استعمال کیا گیا۔ انہوں نے کہا کہ وہ تمام شواہد سی آئی ڈی اور ای ڈی کے حوالے کریں گے۔
