حیدرآباد: طویل گرمائی تعطیلات کے بعد شہر اور اطراف کے اضلاع میں کل جمعرات 12 جون سے Schools دوبارہ کھلنے جا رہے ہیں۔ ہزاروں طلبہ کے لیے تعطیلات کا بے فکری سے بھرپور وقت اب یونیفارم، بستے اور اسکول بیل کی گونج میں تبدیل ہونے والا ہے۔
والدین اور بچے پچھلے کئی دنوں سے اسٹیشنری، لنچ باکس، واٹر بوٹلز اور دیگر اسکول کے ضروری سامان کی خریداری میں مصروف نظر آئے۔ بازاروں میں حسب روایت بیک ٹو اسکول سرگرمیوں کی چہل پہل دیکھی جا رہی ہے۔
دوسری جانب سرکاری اسکولوں میں اساتذہ اور عملہ کلاس رومز کو خوشنما بنانے میں مصروف ہیں تاکہ واپسی پر طلبہ کو خوشگوار ماحول ملے۔ کلاس رومز میں سجاوٹ اور صفائی کا عمل تیزی سے مکمل کیا جا رہا ہے۔
ٹرانسپورٹ ڈپارٹمنٹ کے مطابق حیدرآباد، رنگاریڈی اور میڑچل اضلاع میں 12,842 اسکول بسوں کا بیڑہ تیار ہے تاکہ طلبہ کو محفوظ انداز میں اسکول پہنچایا جا سکے۔
اگرچہ چند بین الاقوامی اسکول پہلے ہی دوبارہ کھل چکے ہیں، لیکن اکثریتی اسکول جمعرات سے باضابطہ طور پر نئے تعلیمی سال کا آغاز کریں گے۔ والدین، اساتذہ اور طلبہ سب پرجوش ہیں کہ نیا تعلیمی سال خوش اسلوبی سے شروع ہو۔
