حیدرآباد: عالمی مقابلہ حسن کے ضمن میں حیدرآباد میں تلنگانہ سکریٹریٹ کے قریب لگائے گئے بین الاقوامی پرچموں میں شامل Israeli Flag کو ایک مقامی نوجوان کی جانب سے ہٹائے جانے پر شہر بھر میں شدید عوامی بحث چھڑ گئی ہے۔
ذرائع کے مطابق، یہ واقعہ اس وقت پیش آیا جب مس ورلڈ ایونٹ کے سلسلے میں مختلف ممالک کے پرچم تلنگانہ سکریٹریٹ کے اطراف نصب کئے گئے تھے تاکہ عالمی اتحاد اور ثقافتی ہم آہنگی کو اجاگر کیا جا سکے۔ انہی پرچموں میں اسرائیل کا جھنڈا بھی شامل تھا، جسے دیکھ کر ذاکر نامی ایک مقامی نوجوان نے احتجاجاً اکھاڑ پھینکا۔
ذاکر نے اس عمل کی ویڈیو بھی بنائی اور سوشل میڈیا پر اپ لوڈ کی، جو چند لمحوں میں وائرل ہو گئی۔ اس ویڈیو کے وائرل ہوتے ہی شہریوں کے درمیان شدید ردعمل سامنے آیا۔ کچھ افراد نے ذاکر کے اقدام کو فلسطینی عوام سے یکجہتی کی علامت اور ظلم کے خلاف آواز بلند کرنے کی جرات قرار دیا، جب کہ دوسروں نے اسے قانون شکنی اور عالمی سفارتی آداب کی خلاف ورزی قرار دیا۔
حیدرآباد پولیس نے اس واقعہ کے سلسلے میں دو مقدمات درج کرتے ہوئے ملزم کو گرفتار کر لیا ہے۔
