حیدرآباد: ریاست تلنگانہ میں جونیئر ڈاکٹروں نے انتباہ دیا ہے کہ اگر ان کے مطالبات پر فوری کارروائی نہ کی گئی تو وہ 30 جون سے تمام میڈیکل کالجوں میں ریاست گیر احتجاج کا آغاز کریں گے۔
[en]Junior Doctors Strike[/en] کے پیش نظر تلنگانہ جونیئر ڈاکٹرس اسوسی ایشن کے صدر مدن کمار نے کہا کہ حکومت مسلسل وظائف (stipends) کی ادائیگی میں تاخیر کر رہی ہے اور ان کی رقم میں نظرثانی کے مطالبے پر بھی کوئی سنجیدہ اقدام نہیں کیا جا رہا۔
انہوں نے کہا کہ حکومت کو فوری طور پر سرکاری اور خانگی میڈیکل کالجوں میں بنیادی انفراسٹرکچر کی بہتری اور فیکلٹی کی بھرتیوں کا مسئلہ بھی حل کرنا ہوگا۔
اس سے قبل بھی جونیئر ڈاکٹروں نے احتجاج کا انتباہ دیا تھا، تاہم وزیر صحت دامود ر راجہ نرسمہا نے مذاکرات کے ذریعہ مسئلہ حل کرنے کی اپیل کرتے ہوئے ہڑتال کو مؤخر کروایا تھا۔
ایسوسی ایشن کا کہنا ہے کہ اگر اس مرتبہ بھی کوئی ٹھوس قدم نہیں اٹھایا گیا تو ریاست کے تمام میڈیکل اداروں میں علامتی مظاہروں کے ساتھ خدمات کو معطل کرنے پر مجبور ہوں گے۔
