حیدرآباد: وزیر تلنگانہ جوپلی کرشنا راؤ نے گروکل اور سرکاری اسکولوں میں حالیہ Food Poisoningکے واقعات کو سیاسی رنگ دینے پر بی جے پی قائدین کو سخت تنقید کا نشانہ بنایا۔ انہوں نے الزام عائد کیا کہ بی جے پی ان واقعات کو انتخابی فائدے کے لیے توڑ مروڑ کر پیش کر رہی ہے۔
اتوار کے روز جوپلی کرشنا راؤ نے ناگرکرنول جنرل اسپتال کا دورہ کیا، جہاں ان کے ہمراہ مقامی رکن اسمبلی ڈاکٹر کوچکلا راجیش ریڈی بھی موجود تھے۔ دونوں قائدین نے اویالواڑہ مہاتما جیوتی با پھولے گرلز گروکل اسکول کی ان طالبات کی عیادت کی، جو مشتبہ Food Poisoning کے باعث اسپتال میں داخل کی گئی تھیں۔
اسپتال کے عملے نے وزیر موصوف کو طالبات کی صحت کے بارے میں تفصیل سے آگاہ کیا۔ بعد ازاں وزیر نے اسکول کے کچن اور اطراف کے علاقوں کا معائنہ کیا۔ اس موقع پر اسکول کی پرنسپل للیتا نے متاثرہ طالبات سے وزیر کی ملاقات کروائی۔
سابق حکومت کے دوران اسکولی بیماریوں کا حوالہ
میڈیا سے گفتگو کرتے ہوئے جوپلی کرشنا راؤ نے سوال اٹھایا کہ کیا سابق وزیر ہریش راؤ کو وہ 1,023 طلبہ یاد نہیں جنہیں بی آر ایس حکومت کے دور میں کستوربا اور گروکل اسکولوں میں بیماری لاحق ہوئی تھی؟ انہوں نے کہا کہ اُس وقت کئی اموات بھی واقع ہوئی تھیں۔
انہوں نے سابق حکومت پر بغیر مناسب انفراسٹرکچر کے اسکول کھولنے کا الزام لگایا اور کہا کہ بہت سے کیمپس ایک سے زائد منڈل کی طالبات کو خدمات فراہم کر رہے ہیں، جس سے مسائل میں اضافہ ہوا ہے۔
انہوں نے چیف منسٹر ریونت ریڈی کی تعلیمی شعبے میں اصلاحات، بجٹ میں اضافہ، اور وسائل کی تقسیم کو سراہا۔
تحقیقات اور ماہانہ معائنوں کا اعلان
اس واقعے کو بدقسمت قرار دیتے ہوئے وزیر نے مکمل تحقیقات کا حکم دیا اور کہا کہ ذمہ دار افراد کو فوری طور پر معطل کیا جائے گا۔
انہوں نے ضلع طبی ٹیموں اور اسپتال کے عملے کی بروقت کارروائی اور مؤثر علاج پر ان کی ستائش کی، جس سے طالبات کی جلد صحتیابی ممکن ہوئی۔
چوپلی نے اعلان کیا کہ وہ اپنے حلقے کے تمام گروکل اسکولوں کا ماہانہ معائنہ کریں گے۔ انہوں نے عہدیداروں کو ہدایت دی کہ کھانے کی تیاری کرنے والی ایجنسیوں کی نگرانی سخت کی جائے اور اسکول کے انفراسٹرکچر سے متعلق زیر التوا مسائل پر فوری کارروائی کی جائے۔
اس موقع پر کئی کانگریس قائدین بھی وزیر کے ہمراہ اسپتال اور اسکول کے دورے پر موجود تھے۔
