حیدرآباد: کریم نگر ضلع کےایلنتا کنٹہ منڈل کے لکشمنا پلی گاؤں میں محبت میں ناکامی کے باعث 24 سالہ نوجوان نے خودکشی کر لی۔ یہ واقعہ اس وقت پیش آیا جب نوجوان کو اپنی دیرینہ محبوبہ کی کسی اور سے شادی کا شدید صدمہ پہنچا۔
پولیس کے مطابق، متوفی کی شناخت دارا ایلیش کے طور پر کی گئی ہے، جو گزشتہ سات برسوں سے ورا لکشمی نامی خاتون کے ساتھ تعلقات میں تھا۔ تاہم حالیہ دنوں میں ورا لکشمی کی شادی کسی اور شخص سے ہو گئی، جس کے بعد ایلیش شدید ذہنی دباؤ میں آ گیا۔
خودکشی سے قبل ایلیش نے ایک سیلفی ویڈیو ریکارڈ کیا جس میں اس نے اپنے اقدام کی وجوہات بیان کیں۔ ویڈیو میں اس نے ورا لکشمی پر دھوکہ دہی کا الزام عائد کیا اور اپنے سات سالہ رشتے کے اچانک خاتمے پر دکھ کا اظہار کیا۔
رپورٹس کے مطابق ایلیش نے ویڈیو بنانے کے فوراً بعد تیز رفتار ٹرین کے آگے چھلانگ لگا دی۔ مرنے سے پہلے اس نے اپنے والدین سے درخواست کی کہ جب تک ورا لکشمی جائے وقوعہ پر نہ پہنچے، تب تک اس کی لاش کو نہ ہٹایا جائے۔ اس نے مزید کہا کہ خاتون کے اہل خانہ کے خلاف قانونی کاروائی کی جائے اور اس نے اپنے موبائل فون میں تمام کال ریکارڈنگز بطور ثبوت محفوظ کر رکھی ہیں۔
پولیس نے اس واقعہ کا مقدمہ درج کر لیا ہے اور تحقیقات کا آغاز کر دیا گیا ہے۔ حکام معاملے کے تمام پہلوؤں کا جائزہ لے رہے ہیں تاکہ کسی بھی قسم کی قانونی ذمہ داری کا تعین کیا جا سکے۔
