حیدرآباد: ساؤتھ سنٹرل ریلوے سکندرآباد ڈویژن کے اسسٹنٹ کمرشل منیجر شیو پرساد نے اعلان کیا ہے کہ وزیر اعظم نریندر مودی 22 مئی کو ورچوئل طریقہ سے Karimnagar Railway Station کی جدید کاری کے منصوبے کا باضابطہ آغاز کریں گے۔
کریم نگر ریلوے اسٹیشن میں منعقدہ ایک پریس کانفرنس میں شیو پرساد نے بتایا کہ یہ منصوبہ ’’امرت بھارت اسٹیشن اسکیم‘‘ کے تحت انجام دیا جا رہا ہے، جس کا افتتاح اگست 2023 میں وزیر اعظم مودی نے کیا تھا۔ تب سے کریم نگر اسٹیشن پر مختلف ترقیاتی سرگرمیاں جاری ہیں۔
ترقیاتی کاموں میں اپروچ روڈ کی تعمیر، چھ بکنگ کاؤنٹرس، معذور افراد کے لیے علیحدہ کاؤنٹر، 12 میٹر چوڑا فٹ اوور بریج، دو ایسکلیٹرس، اسٹیشن کے سامنے پارک، آرام دہ ویٹنگ ہال، اور رہنمائی کے لیے سائن بورڈس کی تنصیب شامل ہے۔
شیو پرساد نے مزید بتایا کہ ریاست تلنگانہ میں تین ریلوے اسٹیشنوں کی جدید کاری کا افتتاح 22 مئی کو وزیر اعظم مودی کے ہاتھوں ورچوئل انداز میں کیا جائے گا، جن میں کریم نگر ریلوے اسٹیشن بھی شامل ہے۔ فی الوقت ریاست کے 37 ریلوے اسٹیشنوں پر ترقیاتی کام جاری ہیں تاکہ مسافروں کو بہتر سہولیات فراہم کی جا سکیں۔
