حیدرآباد: بی آر ایس سربراہ اور سابق وزیراعلیٰ کے چندر شیکھر راؤ (کے سی آر) کی صحت [en]KCR Health[/en] سے متعلق تشویش کے پیش نظر ان کی بیٹی اور رکن قانون ساز کونسل کے کویتا نے جمعہ کو سوماجی گوڑہ کے یشودہ اسپتال کا دورہ کیا، جہاں کے سی آر معمولی علالت کے باعث داخل ہیں۔
ڈاکٹروں کے مطابق، کے سی آر کو جمعرات کی شام تھکن محسوس ہونے پر اسپتال لایا گیا تھا۔ اسپتال کی جانب سے جاری کردہ ہیلتھ بلیٹن میں بتایا گیا کہ ابتدائی معائنے میں ان کے خون میں شوگر کی سطح زیادہ اور سوڈیم کی مقدار کم پائی گئی۔ ان کی حالت اب مستحکم بتائی جا رہی ہے۔
کویتا نے اسپتال میں اپنے والد سے ملاقات کی اور ان کی عیادت کے بعد طبی ٹیم سے تفصیلات حاصل کیں۔ پارٹی ذرائع کے مطابق، انہیں علاج اور صحتیابی کے منصوبے کے بارے میں بریفنگ دی گئی۔
کے سی آر کی طبیعت ناساز ہونے کی اطلاع پر پارٹی کارکنوں اور مختلف سیاسی حلقوں کی جانب سے تشویش کا اظہار کیا جا رہا ہے، جبکہ جلد صحت یابی کی دعائیں بھی کی جا رہی ہیں۔
اسپتال حکام کا کہنا ہے کہ کے سی آر ڈاکٹروں کی نگرانی میں ہیں اور ضرورت پڑنے پر مزید ہیلتھ بلیٹن جاری کیا جائے گا۔
