حیدرآباد: بی آر ایس کے کارگذار صدر کے ٹی راما راؤ KTR نے فارمولا ای کیس میں انسداد بدعنوانی بیورو (ACB) کی تحقیقات کو ایک “اسکرپٹڈ کارروائی” قرار دیتے ہوئے کہا کہ انہیں مسلسل ایسے سوالات پوچھے گئے جن کی کوئی قانونی بنیاد نہیں تھی۔ انہوں نے الزام عائد کیا کہ یہ تمام کارروائی صرف “چٹی نائیڈو” کے اشاروں پر کی جا رہی ہے۔
کے ٹی آر نے پیر کو اے سی بی دفتر سے واپسی کے بعد تلنگانہ بھون میں پارٹی قائدین سے خطاب کرتے ہوئے کہا کہ تقریباً نو گھنٹوں تک انہیں ایک ہی جیسے سوالات دہرائے گئے، جن میں کسی بھی قسم کی بدعنوانی یا بے قاعدگی کا کوئی واضح الزام پیش نہیں کیا گیا۔
انہوں نے کہا کہ حکومت کی جانب سے فارمولا ای ریس کے دوسرے سال کے لیے حیدرآباد میں انعقاد کا باقاعدہ پالیسی فیصلہ کیا گیا تھا اور تمام ادائیگیاں سرکاری ذرائع سے کی گئی تھیں۔ انہوں نے دعویٰ کیا کہ جب انہوں نے اے سی بی افسروں سے کسی ایک بدعنوانی کی نشاندہی کرنے کو کہا تو وہ خاموش ہو گئے۔
کے ٹی آر نے کہا کہ اے سی بی ایسے سوالات کر رہی تھی جیسے پوچھا جا رہا ہو کہ “پیسہ کس ہاتھ سے دیا گیا؟”۔ انہوں نے اسے “لوٹا پیسو کیس” قرار دیتے ہوئے کہا کہ اب کوئی الزام باقی نہیں بچا جس کا جواب وہ نہ دے چکے ہوں۔
انہوں نے چیف منسٹر ریونت ریڈی پر الزام عائد کیا کہ وہ اسمبلی میں اس موضوع پر مباحثے سے بھاگ رہے ہیں۔ کے ٹی آر نے انہیں چیلنج کیا کہ وہ عوام کے سامنے کھلے مباحثے میں آئیں۔ “آپ نے کہا ہم نے غلط کیا، تو اسمبلی میں بحث کیوں نہیں کرتے؟ چار کروڑ لوگوں کے سامنے بات کریں، لیکن آپ چھپ رہے ہیں۔”
کے ٹی آر نے مزید کہا کہ وہ لائی ڈیٹیکٹر ٹیسٹ دینے کو تیار ہیں اور ریونت ریڈی کو بھی ایسا کرنے کی دعوت دی۔ “اگر آپ کے پاس چھپانے کو کچھ نہیں، تو آئیے، لیکن جب سے میں نے یہ چیلنج دیا، آپ غائب ہو گئے ہیں۔”
తెలంగాణ ముఖ్యమంత్రివై ఉండి
జై తెలంగాణ అనని రేవంత్..
నిన్ను బరాబర్ హౌలానే అని అంటాం!– బీఆర్ఎస్ వర్కింగ్ ప్రెసిడెంట్ @KTRBRS🔥 pic.twitter.com/qRUmIn25Wm
— BRS Party (@BRSparty) June 16, 2025
انہوں نے کہا کہ اس کیس میں سابق وزراء کے چندر شیکھر راو اور ہریش راو کو بھی طلب کیا گیا، اور یہ سب کچھ بی آر ایس قیادت کو بدنام کرنے کی منظم مہم کا حصہ ہے۔
ریونت ریڈی پر تنقید کرتے ہوئے کے ٹی آر نے کہا کہ “انہیں صرف جیل بھیجنے کا جنون ہے۔ میں نے افسروں سے کہا، اگر اوپر سے آرڈر آیا ہے تو مجھے جیل بھیج دیں، میں پندرہ دن آرام کروں گا اور پھر واپس آ جاؤں گا۔”
کے ٹی آر نے کالیشورم پراجیکٹ اور فارمولا ای ریس کا دفاع کرتے ہوئے کہا کہ ان اقدامات نے تلنگانہ کی پہچان عالمی سطح پر بلند کی۔ “ہم نے ریاست کی عزت کم نہیں کی، آسمان تک لے گئے، اور اب ہمیں اس کے لیے جیل بھیجا جا رہا ہے۔”
انہوں نے ریٹائرڈ آئی پی ایس آر ایس پروین کمار کا حوالہ دیتے ہوئے کہا کہ “انہوں نے 26 سالہ پولیس سروس میں اس سے زیادہ کھوکھلا کیس کبھی نہیں دیکھا۔”
