حیدرآباد: بھارت راشٹرا سمیتی (بی آر ایس) کے ورکنگ صدر کے ٹی راما راؤ (کے ٹی آر) نے ہائی کورٹ میں ایک درخواست دائر کی ہے جس میں میڈیگڈا بیراج پر بغیر اجازت ڈرون استعمال کرنے کے الزام میں ان کے خلاف درج کیس کو خارج کرنے کی استدعا کی گئی ہے۔ یہ کیس مہادیوپور پولیس اسٹیشن میں درج کیا گیا تھا، جس میں الزام ہے کہ 26 جولائی 2024 کو کے ٹی آر اور ان کے ساتھیوں نے بیراج کا بغیر پیشگی اجازت کے دورہ کیا اور ڈرون اڑایا۔
سماعت کے دوران، سرکاری وکیل نے دلیل دی کہ میڈیگڈا بیراج تلنگانہ کے لیے ایک اہم منصوبہ ہے اور اسے محدود علاقے کی فہرست میں شامل کیا گیا ہے، جہاں کسی بھی دورے یا سرگرمی کے لیے پیشگی اجازت لازمی ہے۔ وکیل استغاثہ نے خدشات کا اظہار کیا کہ بغیر اجازت ڈرون آپریشنز ڈیم کی سیکیورٹی کے لیے خطرہ بن سکتے ہیں اور دوسروں کے لیے مثال قائم کر سکتے ہیں۔
کے ٹی آر کے وکیل نے استدلال کیا کہ کیس میں خاطر خواہ ثبوت کی کمی ہے اور اسے فوری طور پر خارج کیا جانا چاہیے۔ دونوں طرف کی دلائل سننے کے بعد، ہائی کورٹ نے اگلی سماعت 18 مارچ 2025 تک ملتوی کر دی۔
